Governu Timor-Leste

Vise-Ministra Finansas, Sara Lobo Brites, partisipa iha sorumutuk ida iha Ministériu Finansas, iha Dili, ho Autoridade Tributária, ne’ebé mak sai nu’udar ajénsia implementadora ba Reforma Fiskál iha Timor-Leste, iha loron 7 fulan-agostu tinan 2020.

Sorumutuk ne’e nia objetivu mak atu aprezenta avansu sira iha matéria reforma fiskál nian, tuir kompromisu polítiku Governu VIII nian kona-ba Ajenda Reforma Fiskál nian.

Pilar sentrál ida mós husi Reforma Fiskál maka hadi’a infraestrutura Autoridade Tributária Timor-Leste (AT-TL) nian liuhusi utilizasaun sistema sira informasaun nian no teknolojia ne’ebé avansada, hodi hatán ba nesesidade no dezafiu sira ne’ebé AT–TL hasoru.

Atu hadi’a sistema informasaun no teknolojia, daudaun ne’e AT -TL iha faze implementasaun husi SIGTAS Versaun 3, sistema ida-ne’ebé atualizadu no avansadu liu ho karakterístika únika sira maka hanesan:

1. aplikasaun online ne’ebé kontribuinte no AT-TL bele hetan asesu iha kualkér oras no iha fatin ne’ebé de’it, bainhira iha koneksaun ba internet;
2. módulu kompletu sira husi rejistu to’o ba kobransa, husi auditória to’o ba objesaun/rekursu;
3. prosesu sira auditoria nian fasil atu halo dokumentasaun sira;
4. sistema seguransa nian di’ak;
5. garantia ba transparénsia liuhusi utilizasaun “karta no avizu sira” iha ne’ebé kontribuinte sira hetan informasaun no atualizasaun regularmente kona-ba data vensimentu nian husi impostu no atrazu sira-ne’ebé bele mosu iha pagamentu;
6. iha mós módulu espesífiku ida ba Impostu kona-ba Valór Akresentadu (IVA), ne’ebé sei inklui tuir regra ne’ebé maka prevee kona-ba implementasaun Lei IVA nian.

Iha ámbitu atu hadi’a infraestrutura, AT-TL, foin daudaun ne’e, kria no implementa ona plataforma e-Services liuhusi portál www.attl.gov.tl hodi introdús e-Filing no e-Request. Benefísiu prinsipál husi e-Services maka kontribuiente sira bele poupa tempu no rekursu sira, liuliu rekursu finanseiru sira, naran  katak sira aprezenta sira-nia deklarasaun fiskál sira inklui ho pedidu emisaun Sertidaun Dívida (SD) nian. Funsionáriu AT-TL nian sira mós bele sai efisiente no efikás liután, tanba prosesu verifikasaun nian hotu sei la halo tán ho forma manuál. Ida ne’e hanesan AT-TL nia konkista boot ida hafoin tinan 20, hahú husi tempu UNTAET nian.

Aleinde ne’e, liuliu kona-ba utilizasaun sistema informasaun no teknolójia, AT-TL serbisu hamutuk ho parte interesada relevante sira, hanesan Banku Sentrál atu fiskaliza sistema P-24 (portál pagamentu), atu fasilita pagamentu impostu sira iha kaixa automátiku sira (ATM) husi banku komersiál sira ne’ebé indika ona ka iha balkaun sira ne’ebé harii ona iha fatin hotu país nian sein presiza ba forma iha banku hanesan daudaun ne’e kontribuinte sira hasoru.

Autoridade Tributária no nia ekipa kontinua serbisu maka’as hodi hadi’a atendimentu ba sira nia kliente  (kontribuinte) hotu-hotu atubele promove prinsípiu autokonformidade iha ámbitu rejime autoavaliasaun ne’ebé adota ona iha ámbitu sistema administrasaun tributária Timor-Leste nian, nune’e mós reforma tributária globál ne’ebé la’o hela.

Objetivu ikus husi Reforma Fiskál ne’e mak AT-TL iha dezempeñu ne’ebé di’ak liután iha nia funsaun atu kobra no administra impostu sira, atu finansia despeza Estadu nian sira no kontribui liután ba sustentabilidade fiskál, tanba reseita tributária nasionál ka reseita ne’ebé la’ós maihusi mina-rai mak únika fonte rendimentu nian ne’ebé maka reziliente.