Prezidente Repúblika deklara Estadu Emerjénsia hahú tuku 00.00 loron 6 fulan-agostu tinan 2020
Prezidente Repúblika, Francisco Guterres Lú Olo, dekreta ona ohin, loron 5 fulan-agostu tinan 2020, estadu emerjénsia, ba loron 30, husi tuku 00.00 loron 6 fulan-agostu no to’o tuku 23.59 loron 4 fulan-setembru.
Haree ba evolusaun husi situasaun epidemiolójika ne’ebé hamosu preokupasaun, no ba kazu kontájiu COVID-19 nian, ne’ebé tuir rejistu, aumenta ba beibeik, tantu iha nivel rejionál, no mós nivel mundiál, no atubele evita no neutraliza risku SARS-CoV-2 labele da’et no habelar, nune’e proteje saúde públika no kapasidade resposta nian husi Sistema Nasionál Saúde nian, Governu iha sorumutuk ikus Konsellu Ministrus nian, propoin ba Prezidente Repúblika atu fó-sai Deklarasaun Estadu Emerjénsia.
Hafoin paresér favoravel sira husi Konsellu Defeza no Seguransa no Konsellu Estadu no, ho aprovasaun husi Parlamentu Nasionál, Prezidente Repúblika dekreta ona estadu emerjénsia, ne’ebé konsidera tenke halo duni “haree ba evolusaun husi situasaun iha mundu no liuliu iha nasaun viziñu sira”.
Dekretu Prezidensiál ne’e hateten katak tenke “estabelese fila-fali medida lubun ida-ne’ebé prevene importasaun SARS-CoV-2 mai Timor-Leste no ninia tranzmisaun iha populasaun nia leet, liuliu ho bandu ema estranjeiru sira atu tama iha territóriu nasionál, impozisaun ba ema atu halo izolamentu profilátiku (preventivu) obrigatóriu iha kazu balun, no impozisaun ba ema ne’ebé hela iha Timor-Leste atu kumpre medida kontrolu sanitáriu nian sira”.
Governu agora sei aprova medida sira atu ezekuta deklarasaun estadu emerjénsia nian.
