Vise-Ministru Interiór vizita postu fronteira sira iha Kovalima
Vise-Ministru Interiór, António Armindo, akompaña husi Komandante Unidade Patrullamentu Fronteira (UPF), Superintendente João Sancho Pires no Komandante PNTL Munisípiu Kovalima, Superintendente António Maria de Sá, vizita Postu UPF no eskuadra PNTL nian iha área fronteira Timor-Leste ho Indonézia, iha Munisípiu Kovalima, iha loron 1 fulan-agostu tinan 2020.
Vise-Ministru ne’e hateten katak vizita ne’e ninia objetivu permite ba Governante ne’e no ba ekipa téknika husi aprovizionamentu Ministériu Interiór nian atu “haree direta fatin ba instalasaun UPF nian iha futuru, iha munisípiu ne’e no mós hodi rona difikuldade ne’ebé membru UPF nian sira enfrenta iha terrenu”.
António Armindo hateten katak UPF “dezempeña knaar importante ida iha kontrolu iha área fronteira, loron no kalan, ba ema no sasán sira ne’ebé tama tuir dalan ilegál iha Timor-Leste.
Ukun-na’in ne’e rona mós preokupasaun sira ne’ebé hato’o husi responsavel ba kontrolu fronteira nian kona-ba “negosiante sira, ne’ebé maske harii ona postu vijilánsia nian, sira kontinua tama maibé la selu taxa”.
Komandante postu nian sira hato’o mós sira nia difikuldade ne’ebé sira enfrenta kona-ba asesu ba bee, rádiukomunikasaun, farda sira no liuliu kona-ba instalasaun postu sira ne’ebé presiza obra reabilitasaun no loke tan no konstrusaun postu foun sira iha fatin sira ne’ebé identifika ona.
Maske hasoru difikuldade hirak ne’e, UPF hala’o serbisu ne’ebé di’ak tebes hodi reforsa seguransa durante oras 24 loroloron iha liña fronteira rai-ketan nian no iha kooperasaun ho autoridade indonézia nian hodi identifika no kaptura ema sira ne’ebé viola lei hirak ne’ebé mak iha” tenik Vise-Ministru.
Vise-Ministru no nia komitiva hala’o vizita ba membru sira husi Kompañia Bravu Kovalima nian no la’o hale’u postu UPF nian iha Altu Lebos, Fatululik, Fatumea, Belulik Kraik, Aikakar, Walalama, Uamau, Uatumau, Foho Lulik no Lolotoe.
Ukun na’in ne’e iha ona mós planu atu, iha semana tuirmai, sei hala’o mós vizita ida ba Kompañia UPF Charlie iha Rejiaun Administrativa Espesiál Oekusi Ambenu (RAEOA).
