Governu Timor-Leste

Xefe Estadu Maiór Jenerál FALINTIL - Forsa Defeza Timor - Leste (F-FDTL), Majór Jenerál Lere Anan Timur , ne’ebé akompaña husi Brigadeiru Jenerál Ximenes “Sabika”, Brigadeiru Jenerál Cornélio Ximenes "Mau Nana", Xefe Estadu Maiór F-FDTL Koronél Calisto Santos “Coliati”, no Komandante Unidade Polísia Militár, Majór Abel da Costa Xavier “Niki” partisipa iha serimónia Tinan 20 Militár Nova Zelándia nian ne’ebé maka Milísia Pró-Indonézia oho iha Suku Debu-Lulik, Postu Administrativu Tilomár, Munisípiu Kovalima, iha loron 24 fulan-jullu tinan 2020.

Iha ninia diskursu, Majór Jenerál Lere Anan Timur, hatete: “loron ida-ne’e hanesan loron importante tebes mai ita timoroan hotu. Hanesan iha Debululik ha’u hatete ona, katak ba ita-nia ukun an ida ne’e la’ós ita timoroan de’it maka fakar ran, maibé ema rai seluk, povu seluk ninia oan mós mai terus, mai susar, mai fakar sira-nia ran iha rai Timor, atu ita bele sai nasaun ida ne’ebé soberanu no independente iha mundu rai klaran.

Ha’u, lori F-FDTL no Governu nia naran, fó agradesimentu ba ita-nia belun, ita-nia amigu, ita-nia parseiru Nova Zelándia, tanba ninia oan sira mai fakar ran iha ita-nia rai Timor-Leste, ne’ebé ohin, loron 24 fulan-jullu tinan 2020 halo tinan ruanulu.

Timor atravesa situasaun ida difisil teb-tebes, ne’ebé, karik laiha kompromisu internasionál Nova Zelándia, Austrália no país sira seluk, ne’ebé maka mai iha ita-nia rain iha tinan 2000, ita bele oho malu to’o hotu de’it, no sira-nia intervensaun bele rezolve ita-nia problema. Tanba ida ne’e maka baibain ita dehan, ita-nia Nasaun harii ho isin no ran, se ita respeita isin ho ran ida-ne’e, ita tenke respeita mós ita-nia Nasaun ne’ebé soberanu. Hanesan ohin ha’u dehan ona katak la’ós ita timoroan de’it maka fakar ran ba rai ida-ne’e, maibé ita-nia maluk sira, hanesan ita-nia kompañeiru asuwa’in Private Leonard W Manning, Militár Nova Zelándia nian, mai fakar ran iha ita-nia rai Timor-Leste.

Partisipa mós iha serimónia ne’e maka Xefe Estadu Maiór Jenerál FALINTIL-FDTL , Majór Jenerál Lere Anan Timur no reprezentante sira seluk husi FALINTIL-FDTL, eis Primeiru-Ministru, Dr. Rui Araújo, Embaixadór Koreia nian ho nia kaben, Embaixadór Nova Zelándia nian, Adidu Defeza husi Austrália, Portugál, Filipina, Brazíl, Indonézia no reprezentante husi komunidade Kovalima no Tilomár.

Ohin loron ita hanoin hikas Private Manning no ninia família nia sakrifísiu. Ita hanoin hikas mós sidadaun Nova Zelándia nian na’in neen seluk ne’ebé mate hodi luta ba Timor-Leste nia Independénsia: Gary Cunningham, mate iha loron 16 fulan-outubru 1975, iha Balibó, Kamal Bamadhaj, iha loron 12 fulan-novembru tinan 1991, iha Masakre Santa Cruz, Warrant Officer Tony Walser, iha loron 30 fulan-novembru tinan 1999, Staff Sergeant Billy White, iha loron 25 fulan-abríl tinan 2000, Private Len Manning 24 July 2000, Private Boyd Atkins, iha loron 14 fulan-marsu tinan 2001 no Private Dean Johnston, iha loron 28 fulan-jullu tinan 2002