Governu Timor-Leste

Ministru Koordenadór Asuntus Ekonómikus, Joaquim Amaral, no Ministru Finansas, Fernando Hanjam, asina ona akordu ida ho Governadór Banku Sentrál Timor-Leste (BCTL, sigla iha lian portugés) Abraão de Vasconcelos, iha loron 20 fulan-jullu tinan 2020, kona-ba jestaun operasionál atu implementa moratória iha kumprimentu ba obrigasaun hirak ne’ebé maihusi kontratu sira kona-ba konsesaun kréditu, iha ámbitu polítika ekonómika hodi hatán ba COVID-19.

Ho medida ida-ne’e, sidadaun ka empreza sira ne’ebé foti kréditu sira husi instituisaun bankária sira nian ka instituisaun sira-seluk ne’ebé aseita depózitu (Orther Deposit Taking Institions, ODTI) iha Timor-Leste, bele aprezenta, to’o loron ikus fulan-jullu nian, pedidu ida kona-ba rekalendarizasaun kréditu sira, iha sira-nia instituisaun kréditu nian sira.

Programa ida-ne’e jere husi BCTL, ne’ebé maka sei halo pagamentu ba instituisaun kréditu nian sira no fó informasaun hirak ne’ebé presiza kona-ba prosesu kandidatura nian.

Medida ida-ne’e, ne’ebé integra pakote estímulu no resposta ekonómika atu hatán ba efeitu negativu sira ne’ebé bele mosu husi KOVID-19 ba ekonomia nasionál, ninia objetivu mak atu hatán ba impedimentu no difikuldade sira ne’ebé mai husi diminuisaun iha sidadaun no empreza sira-nia reseita no rendimentu, ne’ebé iha relasaun ho ekonomia ne’ebé la’o neineik tebes, tanba efeitu husi surtu COVID-19, no iha relasaun ho risku espirál inkumprimentu nian ida, ne’ebé bele hamosu efeitu negativu sira ba sistema finanseiru no, tuirmai, ba ekonomia reál. Nune’e, estabelese moratória ida atu halo tuir obrigasaun kapitál nian no obrigasaun osan funan nian ne’ebé maihusi kontratu kréditu nian sira, hodi adia sira-nia vensimentu ba fulan tolu.

Hahú ohin, kliente sira husi instituisaun kréditu nian sira ne’ebé hakarak kandidata-an ba medida ida-ne’e, bele kandidata-an liuhusi plataforma online ne’ebé BCTL dezenvolve ona ba efeitu ida-ne’e.