Governu Timor-Leste

Ministru Prezidénsia Konsellu Ministrus, Fidelis Manuel Leite Magalhães, hala’o sorumutuk ida liuhusi videokonferénsia ho reprezentante sira husi Banku Dezenvolvimentu Aziátiku (Asian Development Bank, ADB) , iha loron 24 fulan-jullu tinan 2020.

Partisipa husi Manila, kapitál Filipina nian, iha sorumutuk ne’e maka Paul Dominguez, membru Konsellu Administrasaun ADB nian no Sunil Mitra, Diretór Rezidente ADB nian iha Timor-Leste.

Sorumutuk ne’e nia objetivu mak atu debate parseria sira ne’ebé daudaun ne’e eziste hela entre Timor-Leste no ADB, no prioridade Governu nian sira ba área kooperasaun foun sira iha futuru.

Entre prioridade sira ne’ebé Governante ne’e aprezenta, balu maka hadi’a setór privadu nasionál, reforsu Banku Nasionál Komérsiu Timor-Leste nian (BNCTL, sigla portugés), projetu reabilitasaun Aeroportu Internasionál Nicolau Lobato no dezenvolvimentu governasaun eletrónika no modernizasaun administrativa ba servisu públiku sira.

Kona-ba setór ekonómiku prioritáriu sira, atu favorese diversifikasaun no sustentabilidade ekonómika nasionál, Ministru koli’a liu ba iha setór turizmu no setór agrikultura nian, iha ne’ebé sei identifika medida prinsipál saida de’it maka sei implementa, atu nune’e bele garante katak intervensaun ne’ebé hala’o la prodús de’it efeitu superfisiál, maibé sira sai hanesan inisiativa ne’ebé mak iha valór transformativu loloos.

Reprezentante ADB nian sira fó parabéns ba Governu, tanba nia resposta ba pandemia KOVID-19, no reitera disponibilidade atu apoia Governu hodi alkansa objetivu hirak ne’ebé define ona, atu partisipa iha implementasaun medida sira no atu mobiliza rekursus umanus no finanseirus.