Governu Australianu entrega fatin kuarentena ba Instituisaun F-FDTL
Governu Austrália, liuhusi Kooperasaun Tékniku Militár DCP (Defense Cooperation Program), apoia konstrusaun ba instalasaun kuarentena, ho kama 20, iha servisu saúde militár nian iha Metinaru, hodi apoia karik mosu faze daruak COVID-19. Serimónia hala’o iha loron 10 fulan-jullu tinan 2020, iha Metinaro.
Tuir Vise-Xefe Estadu Maiór Jenerál FALINTIL – Forsa Defeza Timor-Leste (F-FDTL) Brigadeiru Jenerál Domingos Raul “Falur Rate Laek”, instalasaun sira kuarentena nian ne’ebé harii ona iha Metinaru sei uza liuliu ba militár sira no sira-nia família, karik sira afeta ho moras Covid-19 ne’e.
“Ami mak iha ne’e, señora doutora, Ministra Saúde, parseiru Austrálianu sira, ne’ebé apoia ita ho infraestrutura ne’e, ami-nia Xefe Saúde Militár nian, no mós konvidadu balu, ba serimónia inaugurasaun fatin kuarentena ne’e. Ida ne’e hanesan medida preventiva ida para kontinuasaun moras surtu COVID-19. Karik moras ne’e mai iha ita nia nasaun, ita bele tau iha ne’e ita-nia forsa, ita-nia família ne’ebé presiza no ema sira seluk ne’ebé iha relasaun ho forsa sira. Ita bele tau sira iha ne’e, hanesan família militár nian sira. Hotu-hotu bele hela iha ne’e. Kada barraka bele simu ema to’o na’in 20, no sei iha tán barraka ida, ne’ebé presiza sei hadi’a tán, hodi ita bele aumenta espasu kuarentena nian”, hateten Vise-Xefe Estadu Maiór Jenerál F-FDTL nian Falur Rate Laek.
Kona-ba atendimentu nian, Vise-Xefe Estadu Maiór Jenerál F-FDTL ne’e esplika katak, “ohin ita-hotu haree ona aprezentasaun ne’ebé halo husi médiku sira , maibé, ba ha’u, importante mak ita hahú uluk lai ho kbiit ne’ebé mak ita iha depois maka sei aumenta nafatin, mai ita dezenvolve ba nafatin.”
“FALINTIL-Forsa Defeza Timor-Leste (F-FDTL) hetan apoiu husi parseiru estratéjiku sira, ba ekipamentu sira ne’e. Tantu iha relasaun ho formasaun, iha Aileu, hanesan ho lojístika, infrastrutura, formasaun ba médiku sira, komunikasoins no enjeñaria, sira ne’e hotu hetan apoiu husi Austrália, apoiu sira-ne’e husi sira, maske ita-nia Governu mós kontinua investe iha forsa armada sira”, hateten Brigadeiru Jenerál Domingos Raul “Falur Rate Laek”.
Partisipa iha serimónia inaugurasaun fatin Kuarentena ba FALINTIL-FDTL nian maka hanesan, Ministra Saúde Dra. Odete da Silva Viegas, Diretora Jerál Prestasaun Servisu Saúde, Vise-Xefe Estadu Maiór Jenerál F-FDTL, Brigadeiru Jenerál Falur Rate Laek, Embaixadór Austrália, reprezentante husi DCP, Xefe Saúde Militár, Tenente Koronél Guido de Oliveira, Komandante Komponente no Divizaun sira husi F-FDTL, inklui Ofisiál , Sarjentu e Prasa sira husi F-FDTL nian.
