Semináriu kona-ba Polítika Orsamentál no Finansas Públikas
Vise-Ministra Finansas, Sara Lobo Brites, partisipa iha abertura husi Semináriu kona-ba Polítika Orsamentál no Finansas Públikas, ne’ebé daudaun ne’e hala’o hela iha Auditóriu Pouzada Baukau nian, husi loron 15 to’o loron 17 fulan-jullu tinan 2020.
Semináriu ne’e organiza hamutuk husi Parlamentu Nasionál, liuhusi Komisaun C (Komisaun Finansas Públikas) no husi Uniaun Europeia, liuhusi projetu “Osan Povu Nian, Jere ho Di’ak”, iha ámbitu komponente daruak husi “Parseria hodi hadi’a prestasaun servisu liuhusi reforsu jestaun no supervizaun finansas públikas nian (PFMO-Komponente 2).
Sara Lobo Brites partisipa nu’udar oradora iha painél ne’ebé dedika ba Polítika Orsamentál, Dezenvolvimentu Ekonómiku no Finansiamentu Despeza Públika nian sira no iha painél ne’ebé relasiona ho Rejime Jestaun Finanseira nian.
Semináriu ne’e hetan partisipasaun husi membru Parlamentu Nasionál na’in 13, oradór na’in 5 no tékniku servisu apoiu ba komisaun sira, tékniku sira servisu finanseiru no tékniku sira husi gabinete auditoria interna Parlamentu Nasionál nian, hamutuk na’in 18, ho funsaun iha área oin-oin Parlamentu Nasionál nian no ne’ebé envolve diretamente iha elaborasaun, análize no redasaun dokumentu tékniku, relatóriu no paresér sira, análize téknika ka inisiativa lejizlativa sira iha ámbitu Orsamentu no Finansas Públikas nian.
Komponente daruak husi PFMO ninia objetivu mak atu reforsa kapasidade atór estatál no la’ós estatál nian sira (Delegasaun Uniaun Europeia iha Timor-Leste, Ministériu Finansas, Parlamentu Nasionál, Kámara Kontas, Komisaun Antikorrupsaun, Polísia Sientífika Investigasaun Kriminál, Inspesaun-Jerál Estadu, organizasaun sosiedade sivíl no órgaun komunikasaun sosiál), atu nune’e sira bele partisipa ho di’ak iha prosesu foti desizaun no iha supervizaun kona-ba uzu husi finansas públikas nian, hodi hadi’a liután prestasaun servisu públiku nian sira.
Projetu ne’e maka rezultadu husi akordu ida entre Uniaun Europeia no Camões, IP, ne’ebé mós nu’udar responsavel ba implementasaun, iha kolaborasaun di’ak ho Ordenadór Nasionál no ho Instituisaun nasionál sira.
Aleinde Vise-Ministra, serimónia ne’e mós hetan partisipasaun husi Viseprezidente Parlamentu Nasionál, Deputada Maria Angelina Lopes Sarmento, iha reprezentasaun husi Prezidente Parlamentu Nasionál, husi Prezidente Komisaun C, Maria Angélica dos Reis, husi Embaixadór Portugál iha Timor-Leste, José Pedro Machado Vieira no husi Embaixadór Uniaun Europeia iha Timor-Leste, Andrew Jacobs.
