Governu Timor-Leste

Primeiru-Ministru, Taur Matan Ruak, kinta ne’e hala’o vizita dahuluk ba iha Quartel Jeral Polísia Nasionál Timor-Leste (PNTL) Kaikoli-Dili,  iha kualidade  nu’udar Ministru Interior  hodi hala’o  enkontru ho estrutura  tomak Komandu Jeral PNTL nian.

Liuhosi reuniaun ne’ebé halibur hotu Komandante hosi Munisípiu sira inklui RAEOA no mós Komandante Unidade sira, Komandante Jeral PNTL, Komisáriu Polísia, Faustino da Costa halo aprezentasaun power point situasaun jerál PNTL nian kona-ba nia susesu no dezafiu sira.

Hafoin aprezentasaun hosi Komandante Jeral PNTL nian, Primeiru-Ministru no Ministru Interior, fahe nia hanoin kona-ba saida mak presija halo ba oin atu mellora di’ak liután instituisaun PNTL hodi presta serbisu ba sidadaun sira tuir kompeténsia ne’ebé lei atribui ona.

Hanesan Ministru tutela, nia esplika, sei kontinua serbisu sira ne’ebé mak antesesór sira husik hela, iha ne’ebé ida di’ak sei mantein, ladún di’ak buka atu hadi’a no aat halakon tiha, tanba PNTL hanesan instituisaun Estadu nian ne’ebé importante ba vida nasaun nian, hanesan mós F-FDTL, ne’ebé presija Estadu nia atensaun.

Aproveita reuniaun refere, Eis Prezidente Repúblika ne’e husu ba Komandu PNTL atu fó importánsia ba buat tolu ne’ebé importante ba vida instituisaun PNTL nian, mak hanesan disiplina, hierarkia no lealdade, tanba só ho buat tolu ne’e mak, sei halo instituisaun PNTL nia organizasaun sei forte no hetan respeitu. Aleinde ne’e husu atu PNTL tau matan ba área tolu importante iha PNTL, hanesan tránzitu, husu atu impoin regara hodi evita asidente viasaun ne’ebé kada tinan númeru mortal sa’e, daruak, husu atu kria kondisaun ba Ofisiál Polísia Suku (OPS) no ikus husu kria mós kondisaun ne’ebé dignu ba Unidade Polísia Fronteira(UPF), mas la signifika unidade sira seluk atu haluha.

Ikus liu Primeiru-Ministru no Ministru Interior sente orgullu bele serbisu ho PNTL hanesan Ministru Interior hodi tau matan ba Instituisaun refere.

Hola parte mós iha reuniaun ne’e, Vise Ministru Interior, Antonio Armindo, Segundu Komandante  Jeral PNTL, Komisáriu Polísia, Mateus de Jesus no ofisiál superior sira seluk.