Governu Timor-Leste

Governu, liuhusi Ministru Finansas, Fernando Hanjam, asina ona, ohin, loron 9 fulan-jullu tinan 2020, iha Ministériu Finansas, iha Dili, akordu sira ho Banku Aziátiku Dezenvolvimentu (ADB, Asian Development Bank) no ho Programa Nasoins Unidas nian ba Dezenvolvimentu (PNUD), ba programa ida ne’ebé relasiona ho seguransa alimentár.

Ho akordu ne’e, ADB fó kontribuisaun finanseira ida ba Governu Timor-Leste, ho valór dolar amerikanu millaun ida, liuhusi Fundu Resposta ba Dezastre Ázia-Pasífiku nian, hodi dezenvolve programa ida apoiu nian ba populasaun ne’ebé afetada  husi COVID-19, liuliu relasiona ba seguransa alimentár.

Ministru mós asina ona akordu ida ho PNUD, ne’ebé sei sai responsavel ba implementasaun programa ida ne’e, iha koordenasaun ho Ministériu Agrikultura no Peskas, ho objetivu atu apoia saúde komunitária no ekonomia agríkola nian sira husi ema sira ne’ebé kbiit-laek tebes. PNUD sei kontribui mós ba projetu ne’e ho valór dolar amerikanu 105.335.

Programa ne’e prevee katak kontribuisaun finanseira ne’ebé fó husi ADB sei uza atu sosa pakote bens alimentares husi agrikultór lokál sira, iha loja agrikultura ka loja lokál sira, hodi fahe ba família kbiit-laek sira.

Sei fó prioridade ba benefisiáriu kbiit-laek rihun 25 husi área sira hanesan Oekusi, Kovalima, Baukau, Bobonaru no Dili, hodi fó pakote hahán ida ne’ebé bele garante dieta ekilibrada ida no rendimentu estra ida ba agrikultór sira iha períodu dezaselerasaun ekonómika ne’e nian.