Ministru Prezidénsia Konsellu Ministrus hasoru malu ho Embaixadór Xina iha Timor-Leste
Ministru Prezidénsia Konsellu Ministrus, Fidelis Manuel Leite Magalhães, hasoru malu ho Embaixadór Xina iha Timor-Leste, Xiao Jianguo, iha loron 9 fulan-juñu tinan 2020, iha Palásiu Governu, Dili. Durante sorumutuk ne’e ko’alia kona-ba programa kooperasaun xineza iha Timor-Leste, maka hanesan Xina nia apoiu iha luta hasoru COVID-19 no área kooperasaun foun sira entre nasaun rua ne’e nian.
Embaixadór Xina halo balansu ida kona-ba área kooperasaun xineza oin-oin no kona-ba asaun sira apoiu nian iha resposta husi Governu ba COVID-19. Nia ko’alia liu kona-ba doasaun ekipamentu no suprimentu médiku sira, ho lote dahuluk husi produtu sira to’o iha Timor-Leste iha inísiu fulan marsu, iha karregamentu ida ne’ebé inklui ona kámara imajen térmika ida hodi halo monitorizasaun ba temperatura, atu uza iha Aeroportu Internasionál Nicolau Lobato. Dezde lote produtu médiku dahuluk ne’e to’o iha ita-nia nasaun, Governu xinés oferese tiha ona ba Timor-Leste máskara, ropa protesaun, vizeira, luvas médikas, termómetru no ventiladór portátil lubun ida.
Xiao Jianguo hato’o nia disponibilidade hodi kontinua apoia Timor-Leste, la’ós de’it iha área saúde maibé mós iha área kooperasaun sira seluk, no hatutan tan katak bainhira planu rekuperasaun ekonómika prontu ona, Governu bele fiar katak Xina sei fó apoiu ne’ebé presiza. Diplomata ne’e mós hateten katak Xina sei fó dolar amerikanu millaun rihun rua, durante tinan rua oinmai, hodi tulun atu kombate COVID-19 no iha dezenvolvimentu ekonómiku no sosiál iha nasaun sira ne’ebé afetadu husi pandemia, liuliu nasaun sira ne’ebé foin dezenvolve.
Ministru Prezidénsia Konsellu Ministrus, agradese ba Xina nia apoiu ba Timor-Leste, liuliu nia resposta ne’ebé lais no nia oferta ekipamentu no suprimentu médiku sira, hodi luta hasoru COVID-19.
Nia esplika katak iha hela prosesu finalizasaun ba medida prevensaun COVID-19 lubun ida, iha serbisu hamutuk entre Ministériu Saúde, Ministériu Negósius Estranjeirus no Kooperasaun no Ministériu Interiór. Governante ne’e refere mós aprezentasaun preliminár, ne’ebé Prezidente Komisaun atu elabora planu rekuperasaun ekonómika halo ona ba Konsellu Ministrus, kona-ba medida sira ba tempu badak ne’ebé sei aprova no implementa iha tinan 2020, ho objetivu atu apoia satisfasaun ba nesesidade bázika sidadaun sira nian, apoia traballadór setór informál, mantein serbisu no rendimentu no mantein empreza sira iha merkadu.
Ministru Prezidénsia Konsellu Ministrus hasoru malu ho Embaixadór Xina iha Timor-Leste
