Governu husu ba RTTL-EP atu buka garante ninia reseita rasik hodi sustenta funsionamentu kompañia nian
Ministru Asuntus Parlamentares no Komunikasaun Sosiál, Francisco Jerónimo, akompaña husi Sekretáriu Estadu ba Komunikasaun Sosiál, Merício Juvinal dos Reis “Akara”, halo vizita kortezia ida ba empreza públika Rádiu no Televizaun Timor-Leste (RTTL), iha kinta ne’e, loron 2 fulan-jullu tinan 2020, hodi haree kondisaun empreza públika ne’e nian no hodi rona preokupasaun husi dirijente sira instituisaun ida-ne’e nian.
Ministru Asuntus Parlamentares no Komunikasaun Sosiál afirma katak “RTTL-EP hanesan empreza públika ida ne’ebé tenke haka’as-an hodi buka sira-nia reseita rasik atubele sustenta funsionamentu kompañia nian”.
“Bainhira ita ko’alia kona-ba Rádiu no Televizaun Governu ka Estadu nian, signifika katak Estadu mak iha obrigasaun atu garante ninia funsionamentu, maibé bainhira RTTL-EP nakfilak-an ona ba empreza públika ida, signifika katak nu’udar órgaun komunikasaun Estadu nian ida, ne’ebé simu subvensaun públika husi Governu, maibé apoiu ba ninia funsionamentu la depende de’it ba Estadu no katak nu’udar empreza públika, tenke buka sira-nia reseita rasik atubele sustenta-an” Ministru ne’e hatutan”.
Kona-ba kustu totál hamutuk dolar amerikanu millaun ida rihun atus neen, ne’ebé Prezidente RTTL-EP nian aprezenta atubele kobre funsionamentu empreza públika ne’e nian, Francisco Jerónimo hateten katak empreza no Governu tenke iha responsabilidade ne’ebé hanesan no valór ne’e tenke fahe hanesan ba parte rua, parte ida mai husi Governu no ida seluk husi RTTL-EP.
Ministru Asuntus Parlamentares no Komunikasaun Sosiál subliña mós katak “agora tempu atu serbisu no Governu sei buka dalan hodi solusiona problema ne’ebé instituisaun ne’e hasoru”.
Sekretáriu Estadu ba Komunikasaun Sosiál, Merício Juvinal dos Reis “Akara”, husu atu kria Konsellu Redasaun ida ba RTTL-EP, hodi tulun instituisaun ne’e atu responde ba kontestasaun no reklamasaun saida de’it husi públiku, relasiona ho publikasaun notísia sira ne’ebé provoka insatisfasaun iha públiku.
“Konsellu Redasaun ida-ne’e sei halo serbisu hodi tulun imi atu diskute kona-ba notísia sira ne’ebé bele ka labele publika no bainhira iha kontestasaun ruma imi bele hatán, inklui iha kazu sira ne’ebé Governu maka kestiona buat ruma, Konsellu Redasaun ne’e bele esplika lalais kedas”, Sekretáriu Estadu ne’e hatutan.
Merício Juvinal dos Reis “Akara” apela mós ba RTTL-EP hodi aprezenta planu estratéjiku instituisaun nian, iha ne’ebé indika medida hirak ne’ebé presiza hodi dezenvolve empreza ne’e. Sekretáriu Estadu ne’e husu mós atu mantein atividade no progresu sira ne’ebé alkansa ona no atu hadi’a liután frakeza sira ne’ebé iha.
