Governu Timor-Leste

Ministru Prezidénsia Konsellu Ministrus, Fidelis Manuel Leite Magalhães, no Grupu Traballu ba Projetu Rekualifikasaun Aeroportu Internasionál Prezidente Nicolau Lobato, hala’o sorumutuk iha loron 30 fulan-juñu, iha Palásiu Governu, iha Dili.

Durante sorumutuk ne’e, Prezidente Grupu Traballu, José Abel no membru sira-seluk, haree filafali ba saida de’it maka halo ona iha faze oioin projetu ne’e nian, hahú kedas husi inísiu to’o agora no sira aprezenta planu mestre ne’ebé Grupu Traballu prepara ona, ne’ebé inklui opsaun téknika oioin atu implementa projetu no ninia impaktu sosiál, finanseiru, legál no ambientál sira. Sira ko’alia mós kona-ba tulun husi entidade parseira oioin ba implementasaun projetu ne’e nian.

Projetu ne’e prevee estensaun ba pista aterrajen nian, torre kontrolu nian foun ida, rekualifikasaun ba terminál pasajeiru nian no hadi’a estrada ba aeroportu.

Grupu Traballu ne’e kria husi Komisaun Interministeriál ne’ebé kria iha loron 24 fulan-maiu tinan 2019 atu halo negosiasaun kona-ba apoiu finanseiru ba rekualifikasaun Aeroportu Internasionál Prezidente Nicolau Lobato, hodi kumpre kompromisu Governu Konstitusionál VIII nian atu hadi’a Aeroportu Dili nian no ho objetivu atu asegura koordenasaun husi intervensaun negosiál husi departamentu governamentál oioin iha ámbitu prosesu negosiasaun nian kona-ba apoiu ho entidade parseira oioin atu implementa projetu ne’e.

Grupu Traballu ne’e kompostu husi reprezentante husi Ministériu relevante sira no sai nu’udar responsavel atu foti desizaun téknika sira no aprezenta rekomendasaun sira ba Komisaun Interministeriál kona-ba dezenvolvimentu projetu ne’e nian. Grupu Traballu ida-ne’e sai mós responsavel atu asegura katak rekizitu tékniku, sosiál, finanseiru no legál hotu-hotu kumpre duni, hodi garante koordenasaun ho entidade hotu-hotu ne’ebé envolve, atu atinje espetativa no rekizitu Governu nian ba rekualifikasaun aeroportu.