Governu Timor-Leste

Ministru Prezidénsia Konsellu Ministrus, Fidelis Manuel Leite Magalhães, hala’o sorumutuk ho Prezidente Krús Vermella Timor-Leste (CVTL, sigla portugés), Madalena Hanjan, iha loron 16 fulan-juñu, iha Palásiu Governu, Dili.

Durante sorumutuk ne’e, ko’alia kona-ba projetu sira ne’ebé hala’o hela husi CVTL, kona-ba planu sira Governu nian atu estabiliza no rekupera ekonomia, no kona-ba oinsá atubele artikula kooperasaun Governu nian ho CVTL.

Voluntáriu no funsionáriu sira CVTL nian hamutuk hela ho Ministériu Saúde, hodi hatán ba COVID-19, ho asaun oioin, hanesan harii instalasaun saúde no sentru kuarentena nian sira, iha asaun sensibilizasaun nian sira hodi prevene propagasaun koronavirus foun, iha instalasaun infraestrutura fase liman nian-sira no iha rekrutamentu enfermeiru no médiku sira. Aleinde ne’e, atua mós iha prevensaun ba dengue, ho asaun sira iha munisípiu nasionál sira-hotu.

Ministru husu ba Prezidente CVTL atu halo relatóriu ida, hodi inklui projetu sira organizasaun nian no nesesidade apoiu nian sira husi Governu, no manifesta disponibilidade atu artikula ho membru Governu sira-seluk, hodi fó apoiu ba CVTL.

Fidelis Magalhães esplika mós medida sira husi planu estabilizasaun nian, ne’ebé sei harii baze hodi implementa planu rekuperasaun ekonómika, ne’ebé sei hala’o husi Komisaun ne’ebé lidera husi eis-Ministru Finansas, Rui Gomes. Ministru hatete mós katak medida sira, ne’ebé inklui iha planu estabilizasaun, prepara ona, ho objetivu atu kontribui ba esforsu Ministériu Saúde nian hodi hamenus movimentu sidadaun sira no fasilita distánsia sosiál, hodi antesipa diminuisaun ai-han iha merkadu, karik mosu interrupsaun iha kadeia sira abastesimentu nian, hodi apoia sidadaun sira no setór privadu ne’ebé afeta ona husi kontrasaun ekonomia, no hodi hasoru diminuisaun husi kapasidade atu sosa, husi sidadaun sira.

Entre medida oioin ne’ebé ko’alia ona, Governante destaka mós medida sira hodi apoia empregu no apoiu monetáriu ba agregadu familiár sira, iha ámbitu pandemia COVID-19, ne’ebé ninia objetivu atu favorese atividade ekonómika, hodi mantein konsumu, tulun atividade husi setór privadu no evita dezempregu.

Ministru Fidelis temi mós katak, foos ne’ebé Governu sosa ona, mai ho objetivu prinsipál atu haforsa stock foos iha rai-laran, no evita diminuisaun ai-han durante pandemia COVID-19. Governante hato’o mós importánsia atu asegura katak distribuisaun ai-han la hamosu problema ka efeitu negativu sira iha produsaun lokál no iha atividade sira setór privadu nian, ho hanoin katak merkadu estavel nafatin, kuantidade ai-han ne’ebé iha la hamenus no laiha aumentu inflasaun ne’ebé signifikativu. Distribuisaun ai-han ne’ebé boot, bele hamosu efeitu negativu sira iha setór privadu nia atividade no iha produsaun nasionál, ne’ebé sei hamosu dezempregu no problema sosiál seluk tan.