Governu hahú selu apoiu osan ba uma-kain sira iha ámbitu pandemia COVID-19 nian
Vise-Primeira-Ministra no Ministra Solidariedade Sosiál no Inkluzaun, Armanda Berta dos Santos, ohin, loron 9 fulan-juñu 2020, halo lansamentu ofisiál ba pagamentu apoiu osan ba uma-kain sira iha ámbitu pandemia Covid-19 nian, iha serimónia ida ne’ebé hala’o iha suku Komoro, Postu Administrativu Don Aleixo, Munisípiu Dili.
Montante husi apoiu osan ne’e maka dolar amerikanu 100 kada fulan, ba uma-kain ida-idak, iha ne’ebé laiha membru ida maka simu saláriu fulan-fulan ho valór 500 dolar amerikanu ka liu. Medida ida-ne’e ninia objetivu mak atu fó apoiu ba família sira ne’ebé kbiit laek liu, ne’ebé lakon sira-nia rendimentu, tanba efeitu negativu husi pandemia COVID-19 ba ekonomia nasionál.
Iha faze dahuluk ne’e, sei selu osan ba fulan rua nian, ho valór osan dolar amerikanu 200 ba uma-kain ida-idak, korresponde ba subsídiu ba fulan rua dahuluk, ne’ebé sei benefisia ba família hamutuk rihun 298, iha país laran tomak, la inklui Rejiaun Administrativa Espesiál Oekusi Ambenu.
Aleinde medida hirak ne’e, Governu implementa daudaun pakote ida kona-ba inisiativa atu fó apoiu sosioekonómiku ba família no ba empreza sira, atu hamenus impaktu ekonómiku husi pandemia COVID-19, ho objetivu prinsipál atu proteje ema, salva empregu, mantein konsumu no atu tulun atividade setór privadu nian.
