Reuniaun coordenasaun implementasaun projetu no programa sira Governu nian
Iha loron 9 fulan-juñu tinan 2020, hala’o ona sorumutuk koordenasaun nian ida kona-ba implementasaun projetu no programa Governu nian sira ne’ebé la’o hela, ne’ebé prezide husi Ministru Prezidénsia Konsellu Ministrus, Fidelis Manuel Leite Magalhães, ho partisipasaun husi Ministru ba Asuntus Parlamentares no Komunikasaun Sosiál, Francisco Martins da Costa Pereira Jerónimo, husi Ministra Saúde, Odete Maria Freitas Belo, husi Ministru Obras Públikas, Salvador Soares dos Reis Pires, no husi Ministru Transportes no Komunikasaun, José Agustinho da Silva.
Durante sorumutuk ne’e, membru Governu sira analiza ona pontu situasaun husi projetu oioin no nesesidade koordenasaun nian sira iha nivel ministeriál no mós iha nivel akordu ho parseiru dezenvolvimentu nian sira.
Entre projetu oioin ne’ebé aborda, membru Governu sira analiza ona projetu reabilitasaun Ospitál Militár Lahane, ne’ebé ninia apoiu ba konstrusaun sei sai hanesan alvu apresiasaun nian iha sorumutuk Konsellu Ministrus nian iha loron 10 fulan-juñu.
Diskute mós, iha sorumutuk ne’e, inisiativa oioin ne’ebé la’o hela, iha ámbitu transportes no komunikasoins nian, hanesan planu asaun ba aviasaun sivíl, projetu reabilitasaun Aeroportu Internasionál Nicolau Lobato, ne’ebé inklui estensaun ba pista aterrajen nian no modernizasaun ba instalasaun sira, projetu dezenvolvimentu aeroportu Baukau, opsaun sira ba ligasaun kabu fibra ótika, ne’ebé sei permite hamenus kustu no aumenta maka’as velosidade iha asesu ba internet.
Projetu sira seluk ne’ebé analiza ona, ne’ebé hela iha prosesu implementasaun ka konkluzaun, inklui terminál foun pasajeiru sira, iha Portu Dili nian, ne’ebé inaugura iha tinan ida-ne’e, projetu konstrusaun Portu baía Tibar nian, ne’ebé la’o hela no konstrusaun ró pasajeiru daruak nian (Nakroma II), ne’ebé konstroi daudaun iha Xina, husi grupu olandés, Damen Shipyards.
