Governu hasoru malu ho Embaixadór Austrália nian iha Timor-Leste
Ministru Prezidénsia Konsellu Ministrus no Ministru Koordenadór Asuntus Ekonómikus iha ezersísiu, Fidelis Manuel Leite Magalhães, hasoru malu ho Embaixadór Austrália nian iha Timor-Leste, Peter Roberts, ohin, loron 4 fulan-juñu tinan 2020.
Durante sorumutuk ne’e, sira ko’alia kona-ba parseria entre Timor-Leste ho Austrália ne’ebé daudaun ne’e la’o hela no área kooperasaun foun sira iha futuru. Ministru aprezenta mós ba diplomata ne’e vizaun no planu Governu nian ba rekuperasaun ekonómika, no Ministru salienta mós medida sira kona-ba apoiu ba empregu, ne’ebé inklui izensaun iha kontribuisaun ba seguransa sosiál no subsídiu estraordináriu 60% ba remunerasaun traballadór sira-nian, hodi hatán ba impaktu COVID-19 nian iha ekonomia no atu estabiliza empregu.
Tema ida mós husi kooperasaun entre Timor-Leste ho Austrália, ne’ebé aborda iha sorumutuk ne’e maka akordu ne’ebé nasaun rua ne’e asina ona, iha loron 26 fulan-maiu tinan 2020, ba kontribuisaun finanseira direta ida husi Governu Austrália ba Timor-Leste, ho valór dolar australianu millaun hitu (besik dolar amerikanu millaun 4,8), hodi apoia reziliénsia komunitária no rekuperasaun ekonómika nasionál durante pandemia COVID-19. Ho akordu ida-ne’e sei finansia projetu infraestrutura komunitária, ne’ebé sei abranje katoluk ida husi Suku hotu-hotu iha Timor-Leste, liuhusi Programa Nasionál Dezenvolvimentu Suku (PNDS). Rekursu hirak ne’e sei fó diretamente ba suku, atu permite loke serbisu no kria atividade ekonómika lokál no fornese infraestrutura bázika sira, hanesan bee, saneamentu no sistema irrigasaun.
Embaixadór Austrália manifesta nafatin nia interese atu kontinua apoia Timor-Leste, liuliu iha nivel reziliénsia ekonómika nasionál no hatán ba impaktu pandemia COVID-19 nian.
