Governu Timor-Leste

Prezidente Repúblika, Francisco Guterres Lú Olo, fó pose ona ba membru foun na’in ualu husi Governu Konstitusionál VIII, iha serimónia ida ne’ebé hala’o iha Palásiu Prezidente Nicolau Lobato, iha loron 29 fulan-maiu tinan 2020, iha Dili.

Membru hirak ne’ebé simu pose iha serimónia ida-ne’e maka: Vise-Primeira-Ministra, Armanda Berta dos Santos, Ministru Prezidénsia Konsellu Ministrus, Fidelis Manuel Leite Magalhães, Ministru Asuntus Parlamentares no Komunikasaun Sosiál, Francisco Martins da Costa Pereira Jerónimo, Ministru Finansas,  Fernando Hanjam, Ministru Administrasaun Estatál, Miguel Pereira de Carvalho, Ministra Saúde, Odete Maria Freitas Belo, Ministru Asuntus Kombatentes Libertasaun Nasionál, Júlio Sarmento da Costa “Meta Mali” no Ministru Agrikultura no Peskas, Pedro dos Reis.

Primeiru-Ministru, Taur Matan Ruak, iha ninia diskursu, hateten katak pose ba membru foun husi Governu Konstitusionál VIII ne’e ninia objetivu mak atu “asegura restabelesimentu normalidade governativa”, hodi hatutan katak Governu hakarak “ho remodelasaun ida ne’e, loke dalan ba estabilidade polítika ne’ebé permite kontributu no envolvimentu timoroan hotu nian, la haree ba sira-nia ideolojia, partidu, iha ne’ebé sira sai nu’udar militante, ka sira nia aspirasaun sira kona-ba nasaun ne’e”.

Primeiru-Ministru hatete mós katak “harii futuru ita nia nasaun nian la tau sees kontributu husi timoroan ida nian no tanba hatene tuir faktu ne’e maka VIII Governu Konstitusionál nakloke ba partisipasaun husi forsa polítika foun nian sira iha esforsu konsertasaun no diálogu ne’ebé maka fundamentál hodi garante katak Timor-Leste no timoroan sira bele mehi futuru ida ne’ebé prósperu no haksolok”.