Governu Timor-Leste

Ministériu Saúde nian halo lansamentu, iha loron 25 fulan-abríl, iha Sentru Mídia husi Sentru Integradu Jestaun Krize, chatbot, servisu mensajen instantánea nian ida liuhusi WhatsApp ho informasaun kona-ba COVID-19. Servisu ne'e hanesan dalan ida atu komunidade sira bele iha asesu ba informasaun hirak ne'ebé relasiona ho COVID-19, liuhosi WhatsApp.

Iha lansamentu ne'e, Diretora-Jerál ba Prestasaun Servisu Saúde, Odete Viegas, esplika katak métodu atu utiliza “haruka mensajen ida ho “hello” ba númeru telefone +670 7556 0000, atu hetan asesu ba informasaun prinsipál sira liga ba dadus no notísia sira kona-ba COVID-19 ".

Diretora ne'e mós hatutan tan katak meiu ne'e bele fasilita komunidade sira hodi husu informasaun balun kona-ba COVID-19 .

Relasiona ho servisu mensajen nian, chatbot, ne'e, reprezentante husi ekipa téknika Ministériu Saúde nian esplika katak ninia objetivu maka atu fahe informasaun ofisiál no kredivel kona-ba COVID-19 ba komunidade no mós atu kontra informasaun falsu no lia-anin sira iha sosiedade nia leet.

“Ho inisiativa ida-ne'e, ita hakarak fahe mós informasaun sira ne'ebé loos kona-ba moras ne’e, atu ita-nia komunidade sira bele sente seguru no bele hamenus sira-nia ta’uk ka pániku”.

Servisu mensajen ida-ne'e dezenvolve husi organizasaun Catalpa International no hetan apoiu husi Organizasaun Mundial Saúde (OMS) no Fundasaun Praekelt.

Relasiona ho komunidade sira ne'ebé la uza telemovel ne’ebé bele liga ba internét, Ministériu Saúde rasik durante ne'e partilla ona informasaun liu hosi SMS no,  hamutuk ho Ministériu nia parseiru sira, fahe ona informasaun ba to’o área rurál sira.

Aleinde ne’e, ekipa servisu saúde nian iha baze mós fahe nafatin informasaun no halo prevensaun direta iha komunidade nia leet, kona-ba COVID-19, liu hosi kanál oin-oin ne'ebé mak ministériu rasik estabelese ona.