Governu Timor-Leste

Aviaun dahuluk nian, rezultadu husi akordu ne’ebé asina ona entre Governu Timor-Leste no Airnorth, iha tersa, loron 7 fulan-abríl, aviaun Airnorth ne’e to’o ohin, iha loron 10 fulan-abril, iha oras 14h35 otl, iha Aeroportu Internasionál Prezidente Nicolau Lobato.

Akordu hirak ne’e mosu hanesan resposta ba restrisaun viajen nian ho eskala boot ne’ebé dekreta ona hodi hapara propagasaun covid-19, no evita atu Timor-Leste labele sai izoladu, sein iha konetividade globál ne’ebé mak esensiál ba movimentu merkadoria, fornesimentu médiku sira ka ba transporte pasajeiru sira iha situasaun emerjénsia nian.

Aviaun ida ne’e ho Embraer E170, husi Airnorth, aviaun ne’e sei semo ba mai semana ida dala tolu entre Dili no Darwin garante kontinuasaun konetividade aérea nian ho forma ida hodi tula ai-moruk no ekipamentus ne’ebé nesesáriu hodi prevene no kombate COVID19 no mós fornesimentu ba sasán esensiál sira no merkadória fundamentál sira ba vida populasaun  nian no ba empréza nasionál sira.

Ministru Estadu Prezidénsia Konsellu Ministru, Agio Pereira afirma katak  “Governu Timor-Leste foti medida konkreta sira hodi proteje povo timoroan no garante seguransa ba ita-nia nasaun.”, “Laiha buat ida mak importante liu fali saúde no ita-nia povu nia seguransa”, Ministru Agio Pereira hateten.

Ministru José Agostinho da Silva hateten katak “ita-nia Governu iha responsabilidade atu mantein rota tránzitu aéreu nian ida hodi garante katak ita bele kontinua lori materiál atu ajuda ita hodi hasoru dezafiu sira ne’ebé maihusi covid-19”. 

Liuhusi ligasaun informasaun ne’ebé iha leten, ita boot sira bele lee komunikadu kompletu kona-ba Governu asina akordu ho Airnorth atu garante kontinuasaun konetividade servisu aéreu sira http://timor-leste.gov.tl/?p=24046&lang=tp