Governu Timor-Leste

Timor-Leste sei iha hela estadu emerjénsia nian husi loron 28 fulan-marsu to’o loron 26 fulan-abríl tinan 2020, hodi evita pandemia COVID-19 da’et habelar. Maske nune’e, projetu Porto Baia de Tibar , hanesan projetu interese nasionál estratéjiku ba país, ninia konstrusaun no ninia atividades asosiados sira, livre husi kualkér suspensaun, ne’ebé inklui mos importasaun ka esportasaun sasán no materiál hirak ne’ebé nesesáriu atu hala’o obra kosntrusaun ne’e.

Hahú husikedas fulan-fevereiru tinan 2020, Konsesionária (Timor Port S.A), hamutuk ho reprezentante husi Governu no China Harbour Timor Lda implementa ona medida preventiva hirak ne’ebé rigoroza no espesífika  atu garante seguransa no saúde traballadór sira-nian no halo sensibilizasaun kona-ba prevensaun no kontrolu infensaun sira, atu evita COVID-19 da’et habelar entre traballadór sira iha fatin projetu nian, fatin ke’e fatuk nian (Pedreira), sentral de betaun nian, kampu traballadór no eskritóriu projetu sira nian.

Medida sira-ne’e, daudaun ne’e, inklui medida hirak tuirmai ne’e; Portaun asesu nian hotu-hotu ba estaleiru konstrusaun nian, fatin ke’e fatuk nian, sentral de betaun nian no akampamentu taka hotu. Portaun asesu sira ne’ebé loke, seguransa na’in-rua maka sei kontrola no traballadór sira ne’ebé tama iha fatin ida-ne’e, sira-nia temperatura isin lolon nian tenke koko iha entrada, ema hotu-hotu tenke fase liman halo moos no uza máskara taka ibun nian. Pesoál hotu-hotu ne’ebé serbisu iha ne’e tenke halo tuir duni prátika distansiamentu seguru/sosiál pelumenus distánsia metru ida husi ema seluk iha fatin ida-ne’e.

Limpeza no dezinfesaun sei halo ba sasán hotu-hotu ne’ebé membru pesoál sira hotu kaer, maka hanesan kaer-fatin odamatan nian, torneira ulun iha dispensadór bee nian, basia sira fase liman nian, torneira ulun sira bee nian, botaun bee sentina nian, interruptór sira, ekipamentu eskritóriu nian sira no mákina sira hanesan mós botaun kontrolu nian iha grua sira, kaer-fatin kontrolu nian, volante no ferramenta portátil sira seluk. Vizitante sira ne’ebé la iha relasaun direta ho fatin ne’e sei labele tama. Subempreiteiru, fornesedór no reprezentante husi fornesedór sira ne’ebé entrega materiál ka presta servisu iha fatin ne’e sei sai alvu husi teste saúde nian iha entrada. Ba traballadór estranjeiru sira ne’ebé hela iha fatin ne’ebá, labele sai arbiru, exetu iha kazu balun ne’ebé mak labele evita ka karik presiza duni. Kualkér kazu suspeitu COVID-19 sei iha resposta emerjénsia relevante, tuir saida maka Governu Timor-Leste ezije, no seluk tan.

Ho medida rigoroza hirak ne’ebé vigora  no kooperasaun ida ne’ebé di’ak, parte sira ne’ebé envolve iha projetu ne’e sei halo buat hotu ne’ebé sira bele halo hodi hamenus efeitu husi COVID-19 iha projetu Portu Baia de Tibar nian no hodi garante saúde no seguransa ba ema hotu-hotu ne’ebé envolve iha projetu ne’e.