Governu Timor-Leste

Prezidente konsellu Administrasaun Autoridade Portuária Timor-Leste, I.P (APORTIL), Flávio Cardoso Neves, horseik, loron 30 fulan-marsu tinan 2020, garante, liuhusi Despaxu, katak Portu Dili, sei funsiona nafatin durante períodu estadu emerjénsia nian.

Servisu Portu Dili nian importante tebetebes no servisu sira-ne’e sei apoia nasaun no sidadaun tomak nia nesesidade bázika sira, hodi garante fornesimentu sasán sira ne’ebe nasaun no sidadaun ne’e presiza tebetebes durante períodu estadu emerjénsia nian.

Despaxu husi Prezidente APORTIL nian, temi regra lubuk ida ne’ebé sei utiliza atu jere atividade Portu Dili, durante períodu estadu emerjénsia nian, iha ne’ebé inklui medida sira kona-ba seguransa no prevensaun ba COVID-19.

Importante atu temi katak Dekretu Governu nian, ne’ebé aprova medida sira atu ezekuta deklarasaun husi estadu emerjénsia, asegura katak servisu sira “ne’ebé ninia prestasaun importante tebes atu garante funsionamentu Administrasaun Públika nian no prestasaun nafatin sasán no servisu sira ne’ebé, ninia natureza urjente ka labele adia tan, ba sidadaun no ba empreza sira,” tenke la’o nafatin.

Dekretu Governu nian ne’e salvaguarda mós katak “ema estranjeiru sira-ne’ebé responsavel ba tula ka liberasaun sasán importadu sira, bele hela de’it iha zona internasionál iha portu tasi nian, aeroportu sira ka postu fronteira rai-maran nian sira, no ba de’it tempu ne’ebé presiza atubele konklui prosedimentu sira relasiona ho entrega ka liberasaun sasán esensiál sira”.