Governu Timor-Leste

Ohin loron 9, fulan-marsu, tinan 2020, Iha horas 9.30 dader, Ministeriu das Finansas - Diresaun Jeral Tesouro halao Abertura ba Formasaun Faze II konaba Kontabilidade no Preparasaun Relatoriu Finanseiru Anual ba oficiais finansas hosi Ajensia Publika Autonoma nain rua nulu (20) ne’ebe sei fahe ba grupo 2 ho durasaun tempu formasaun semana ida ba kada grupu.

Ministra Finansas Interina, Sara Lobo Brites wainhira presidi abertura, hato’o katak objektivu hosi formasaun ne’e atu prepara Dirijentes no Oficiais Finansas Kada Ajensia Publika Autonoma hodi iha konhesimentu adekuadu iha âmbito preparasaun relatório finanseiru anual tinan 2019 ba Parlamentu Nasional no Kamara de Kontas hodi kumpre rekisitus iha Konstituisaun RDTL nomos Lei Orsamentu no Jestaun Finanseira. Para alem-de rekisitus iha Lei hanesan Ajensia Publika Autonoma ne’ebé goza autonomia administrativa no finanseira iha obrigasaun atu presta konta kada tinan hodi responsabiliza ba gastus rekursu publiku, nomos promove boa governasaun no transparênsia fiskal.

Formasaun Kontabilidade no Preparasaun Relatorio Finanseiru Anual ne’e nudar pilar ikus husi pilar hat Jestaun Finansas Publika ne’ebé importante hanesan Mobilizasaun Rekursu Finanseiru, Alokasaun Orsamentu, Ezekusaun orsamentu no ikus liu Relatóriu Prestasaun Kontas.

Espektativa husi rezultadu formasaun ne’e maka, APA nain rua nulu, iha tinan ida ne’e nia laran idak-idak sei prepara rasik sira nia Relatoriu Finanseiru Anual tinan 2019 no tenki submete mai DGT – MdF iha findo Abril 2020 hodi DGT halo revizaun molok apresenta ba Kamara de Kontas iha loron 31 Maio tinan 2020.

Relatoriu hosi APA sira sei konsolida mos iha Relatoriu Finanseiru Konta Jeral Estadu tinan 2019 no submete ba Parlamentu Nasional ho Tribunal de Rekursu iha loron 31 fulan Julho 2020.

Abertura formasaun refere realiaza iha Auditorium - MF no marka presensa hosi Dirijentes Maximu APAs, Ajentes finansas no Dirijentes hosi MF.