Governu Timor-Leste

Timor-Leste sei sai uma-nain ba Semináriu Forum Rejional ASEAN (ARF) kona-ba Rezolusaun Disputa no Direitu Tasi Nian, iha loron 27-28 Fevereiru 2020. Semináriu ne’e sei ko-prezididu husi Timor-Leste, Austrália no Malázia.

Semináriu ne’ebé sei hala’o iha Salaun Enkontru Ministériu Finansas ne’e, sei lori hamutuk partisipante nain-120 husi membrus estadus ARF nian. Timor-Leste nia Líder Nasional no Xefi Negosiador ba Fronteira Marítima, S.E. Kay Rala Xanana Gusmão, sei hato’o diskursu prinsipal iha enkontru refere durante sesaun abertura.

Semináriu ARF ne’e sei fornese forum espesífiku ida ba estadu sira hodi diskuti rezolusaun disputa liga ho direitu tasi nian iha rejiaun, no sei foti ezemplu husi experiénsia rejional sira no mos husi peritu no akadémiku sira, no ezamina kazu anterior sira, liu-liu mak Timor-Leste no Austrália nia prosesu konsiliasaun iha estabelese fronteira marítima permanente liu-husi Komisaun Konsiliasaun UNCLOS.

Timor-Leste no Austrália mak hanesan nasaun primeiru ne’ebe uza Komisaun Konsiliasaun hodi estabelese sira nia fronteira marítima. Tratadu Fronteira Marítima ne’ebe asina ona iha 30 Agostu 2019 mak hanesan pasu importante ba nasaun rua nia relasaun bilateral, ba UNCLOS no ba direitu internasional.

ARF hanesan forum konsultativu rejional ida kompostu husi país partisipante nain-27 ne’ebé mak buka atu fahe hanoin kona-bá asuntu seguransa iha rejiaun Ázia-Pasífika. Timor-Leste hetan konvite hodi hola parte iha ARF iha 2005.

Timor-Leste sai ona hanesan nasaun partisipante ba ARF ne’ebe ativu no sai ona mos uma-nain ba semináriu ARF iha pasadu iha 2011, 2017 no 2019. Experiénsia hirak ne’e haforsa Timor-Leste nia prosesu aplikasaun ba adezaun ba ASEAN, liu-husi nia kapasidade hodi partisipa no organiza eventus ASEAN.

Austrália no Malázia mos suporta Timor-Leste nia aspirasaun atu adere ba ASEAN.