Governu Timor-Leste

Iha dadeer, loron 6 fulan-janeiru tinan 2020 nian ida-ne’e, hahú siklu audiénsia públika nian ida ne’ebé Komisaun Espesializada Permanente Parlamentu Nasionál nian maka promove, kona-ba ezekusaun Orsamentu Jerál Estadu (OJE) tinan 2019 no apresiasaun inisiál ba Proposta Lei kona-ba OJE ba tinan 2020. Audiénsia Públika sira-ne’e hala’o to’o loron 10 fulan-janeiru. Durante períodu ida-ne’e, Komisaun sira sei simu membru Governu sira, Prezidénsia Repúblika, Dirijente sira husi Administrasaun Públika no reprezentante sira husi sosiedade sivíl. Iha loron rua dahuluk audiénsia públika nian, deputadu sira husi Komisaun A - Komisaun Asuntu Konstitusionál no Justisa - simu Ministru Estadu no Ministru Prezidénsia Konsellu Ministrus, Gabinete Primeiru-Ministru, Diretór Sentru Nasionál Chega! nian, Gabinete Apoiu Sosiedade Sivíl, Provedoria Direitus Umanus no Justisa no Komisaun Nasionál Eleisaun nian, hodi halo debate no halo klarifikasaun kona-ba ida-idak nia orsamentu ba tinan finanseiru 2020 nian.

 Ida ne’e hotu tiha, sei prepara relatóriu no paresér ne’ebé sei analiza iha Sesaun Plenária ba diskusaun kona-ba Proposta Lei OJE tinan 2020, ne’ebé sei hahú ho diskusaun no votasaun iha jeneralidade, iha loron 15, 16 no 17 fulan-janeiru. Diskusaun no votasaun iha espesialidade no votasaun finál globál sei hala’o husi loron 20 to’o loron 30 fulan-janeiru. Redasaun finál prevee atu haruka ba Prezidente Repúblika iha loron 31 fulan-janeiru tinan 2020 ne’e.

Proposta OJE ne’e, ho montante totál USD millaun 1.668 (dolar amerikanu millaun rihun ida atus neen, neenulu-resin ualu), ne’ebé inklui reseita sira ne’ebé maihusi RAEOA/ZEESM no Empréstimu sira, atu kobre nesesidade sira husi programa no prioridade nasionál sira ne’ebé Governu Konstitusionál VIII define ona. Proposta OJE ne’e hetan ona aprovasaun iha Sorumutuk Konsellu Ministrus nian iha loron 19 fulan-dezembru tinan 2019, no submete kedas ba Parlamentu Nasionál iha loron hanesan.