Governu Timor-Leste

Autoridade Nasionál Petróleu no Minerais (ANPM), lori Ministériu Petróleu no Minerais nia naran no reprezenta Estadu Repúblika Demokrátika Timor-Leste, asina ona Kontratu kona-ba Partilla Produsaun (PSC, Production Sharing Contract) ho SundaGas no TIMOR GAP, ba kampu gás Chuditch.

Kampu gás nian ne’e lokaliza iha parte súl husi antiga Área Konjunta Dezenvolvimentu Petrolíferu (JPDA, Join Petroleum Development Area) no soi área totál hamutuk besik 3571,49 kilómetru kuadradu.

Kontratu kona-ba partilla produsaun nian ne’e atribui partisipasaun ida ho totál 75% ba SundaGas no 25% ba TIMOR GAP ba programa serbisu esplorasaun nian ida durante tinan hitu.

Prezidente TIMOR GAP, Francisco Monteiro, hateten katak “TIMOR GAP, nu’udar empreza petrolífera Timor-Leste nian sente haksolok ho asinatura PSC ne’e ho ita-nia parseiru husi Joint Venture no ANPM, iha área ida-ne’ebé uluk halo parte ba JPDA no agora halo parte tomak ba jurizdisaun Timor-Leste nian de’it”.

Francisco Monteiro hatutan katak “agora hein atu serbisu iha kolaborasaun ne’ebé di’ak ho parseiru SundaGas, ho ANPM no ho Governu Timor-Leste atu esplora área ne’e, ne’ebé soi rezerva sira ne’ebé importante, hanesan kampu gás Chuditch”.

Prezidente ANPM, Gualdino da Silva, hateten katak “ANPM lori Ministru Petróleu no Minerais nia naran, sei serbisu hamutuk ho SundaGas no TIMOR GAP hodi kumpre PSC ne’e ho seguransa no tuir prazu ne’ebé akordu parte sira konkorda ona”.

Gualdino hateten mós katak “ANPM iha kompromisu boot atu kontinua serbisu ho empreza mina-rai no gás nian sira, no parseiru relevante sira seluk ho hanoin atu kria biban boot barak ba investimentu iha mina-rai no gás ba dezenvolvimentu atividade petrolífera sira iha Timor-Leste.