Governu Timor-Leste

Governu Timor-Leste, liuhusi Sekretáriu Estadu Ambiente, Demétrio de Amaral de Carvalho, iha loron 21 no 22 fulan-outubru tinan 2019, partisipa iha Konferénsia Ministeriál kona-ba Ekonomia Matak, forum globál nivel aas ida, ne’ebé realiza mós iha momentu Simeira Mundiál kona-ba Ekonomia Matak, iha Dubai, iha Emiradus Árabes Unidus.

Simeira no Konferénsia Ministeriál ne’e organiza husi Organizasaun Mundiál Ekonomia Matak (World Green Economy Organization, WGEO), instituisaun ne’ebé harii iha tinan 2016, iha Dubai, ho objetivu atu promove parseria sira entre setór públiku no setór privadu, atu dezenvolve kooperasaun internasionál, atu fahe koñesimentu sira ba implementasaun ekonomia matak iha nivel mundiál no atu promove dezenvolvimentu ekonómiku ida ne’ebé sustentável, inkluzivu no justu iha kriasaun empregu.

Demétrio de Amaral de Carvalho, bainhira sai oradór iha Konferénsia Ministeriál ne’e, ho tema “Kriasaun Kuadru Normativu ida ba Ekonomia Verde”, esplika katak Timor-Leste iha kompromisu ne’ebé prevee iha Planu Estratéjiku Dezenvolvimentu Nasionál (PEDN) nian no iha Programa Governu nian atu aumenta utilizasaun enerjia matak no atu garante katak, iha tinan 2030, 50% husi oferta enerjétika mai husi fonte renovavel sira, no hahú husi tinan 2011 iha projetu oin-oin ba instalasaun painél solár sira.

Sekretáriu Estadu Ambiente nian ne’e hatutan mós katak “dezenvolvimentu ekonómiku atuál halo produsaun lixu plástiku aumenta maka’as iha ami-nia rain”, “tanba ne’e ami hahú ona medida sira kona-ba kombate utilizasaun plástiku, hanesan insentivu iha setór públiku no privadu ba substituisaun plástiku ho opsaun biodegradavel sira no promosaun kampaña sensibilizasaun sira atu hamenus plástiku nian no kuda ai-hun ho tema: saku ida, ai-hun ida”.

“Timor-Leste iha ona planu kona-ba kriasaun sentru formasaun ida ba dezenvolvimentu tékniku resiklajen plástiku”, “tinan ida-ne’e ami estabelese ona unidade produsaun gás nian ki’ik ida, ne’ebé uza rezíduu sira” no “ami hein mós katak bele implementa iha tempu badak projetu seluk kona-ba transformasaun plástiku ba óleu”, Sekretáriu Estadu hatutan.

Partisipa iha eventu ne’e responsavel polítiku no reprezentante sira setór privadu nian husi área ambientál país oin-oin nian, husi kontinente lima. Abertura ofisiál Simeira ekonomia matak ne’e realiza husi Primeiru-Ministru no Viseprezidente husi Emiradus Árabes Unidus nian, Mohammed bin Rashid Al Maktoum, no konta ho prezensa eis-Sekretáriu Jerál Organizasaun Nasoins Unidas nian, Ban Ki-moon, eis-Prezidente Fransés, François Hollande, eis-Prezidente Méksiku, Felipe Calderón no eis-Prezidente Kolómbia, Juan Manuel Santos.