Governu Timor-Leste

Ministru Estadu Prezidénsia Konsellu Ministrus no Ministru Petróleu no Minerais iha ezersísiu, Agio Pereira, iha tersa, loron 29 fulan-outubru tinan 2019, simu reprezentante sira husi kompañia petrolífera rua, ConocoPhillips no Santos Limited, iha Palásiu Governu, Dili.

Vizita reprezentante sira husi ConocoPhillips no Santos Limited nian ba Timor-Leste ne’e hanesan vizita ba dahuluk dezde empreza petrolífera Estadus Unidus nian fa’an ativu sira iha Tasi Timor ba empreza petrolífera Austrália nian. Vizita ne’e mós sai nu’udar biban atu aprezenta reprezentante sira husi Santos Limited ba Governu no parseiru sira Timor-Leste nian.

Iha operasaun ida ho valór dolar amerikanu millaun rihun 1,39, ConocoPhillips fa’an ninia interese operasionál sira iha instalasaun ba prosesamentu Gás Naturál Likefeitu Darwin nian no iha kampu petrolíferu sira hanesan Bayu-Undan, Barossa no Poseidon. Prosesu fa’an nian ne’e hein katak sei remata iha trimestre dahuluk iha tinan oin.

Molok ne’e, Santos iha ona partisipasaun iha konsórsiu Bayu Undan no iha fábrika Darwin LNG, ne’ebé, to’o ohin loron, ConocoPhilips mak hala’o ninia operasaun.

Durante sorumutuk ne’e, Mike Narzoo, Vise-Prezidente Komersiál ba oeste Austrália nian, husi ConocoPhillips, esplika katak iha tinan barak Santos sai ona hanesan empreza parseira Conoco Philips nian, liuliu iha esplorasaun kampu petrolíferu Bayu-Undan nian. Empreza rua ne’e hakarak garante katak tranzisaun ne’e la’o di’ak liu no laiha alterasaun maka’as iha rekursus umanus.

Peter Unden, Vise-Prezidente ezekutivu Santos nian, kongratula Timor-Leste tanba foin daudaun ne’e ratifika ona Tratadu kona-ba Ketan Tasik no manifesta Santos nia kompromisu atu serbisu hamutuk ho Governu Timor-Leste iha dezenvolvimentu Bayu-Undan.

Ministru Estadu ne’e agradese ba ConocoPhilips, ba ninia parseria durante tinan barak ho Timor-Leste, ne’ebé kontribui ona ba dezenvolvimentu nasionál, no hato’o benvindu ba Santos, no fiar katak parseria ne’e sei lori benefísiu ba nasaun no povu Timor-Leste.

Atu hanoin hikas mós katak iha fulan-abríl tinan ne’e, Governu Timor-Leste no ConocoPhillips konklui ona prosesu fa’an partisipasaun hamutuk 30% ConocoPhillips nian iha konsórsiu Greater Sunrise.