Vizita ba uma Mahon iha Lospalos
Vise-Ministra Solidariedade Sosiál no Inkluzaun, Signi Verdial, no Primeira-Dama Timor-Leste, Cidália Lopes Nobre Mouzinho Guterres, hala’o vizita ida ba Uma Mahon iha Lospalos, kapitál Munisípiu Lautein, iha loron 10 fulan-outubru tinan 2019. Vizita ne’e nia objetivu atu haree besik kondisaun no difikuldade sira ne’ebé mak enfrenta husi vítima sira violénsia doméstika no violénsia sexual iha Uma Mahon ne’e.
Signi Verdial hatete katak “atu bele hatán ba difikuldade sira ne’ebé mak Instituisaun Solidariedade Sosiál (ISS) sira enfrenta, presiza iha orsamentu ida adekuadu, tanba ne’e, planu orsamentu ba 2020 ne’ebé tau ona husi Ministériu Solidariedade Sosiál no Inkluzaun (MSSI) prevee aumentu ida ba millaun rua dólar amerikanu”.
“Hein katak ho orsamentu ida-ne’e bele fó apoiu nesesáriu atu ISS bele finansia no hala’o di’ak liután ninia atividade sira”, haktuir Vise-Ministra.
Cidália Mouzinho Guterres afirma ona katak, nu’udar Primeira-Dama, iha “misaun atu haree ba feto no labarik sira ne’ebé vítima violénsia doméstika no violasaun, ho objetivu atu haree besik sira-nia kondisaun no rona sira-nia preokupasaun, inklui difikuldade sira ne’ebé mak Uma Mahon enfrenta”. Hatutan mós katak Gabinete Primeira-Dama nian iha mós orsamentu rasik atu apoia nesesidade ba vítima sira.
