Timor-Leste loke ronda konsesaun lisensa sira nian ba prospesaun no esplorasaun petróleu
Primeiru-Ministru Taur Matan Ruak, ohin, loron 3 fulan-outubru tinan 2019, durante Simeira Internasionál dahuluk kona-ba Petróleu no Gás iha Timor-Leste, loke ronda ida kona-ba konsesaun lisensa sira ba prospesaun no esplorasaun petróleu nian iha país ne’e. Ronda ne’e, hala’o ho objetivu atu oferese oportunidade sira ba investimentu nian ba potensiál petróleu no gás nasionál, no atu kria parseria foun sira, atu nune’e, hamutuk, dezenvolve potensiál ne’e.
Ronda lisensiamentu sira dahuluk nian, hala’o tiha ona iha tinan 2005/2006. Ida ne’e nu’udar ronda lisensiamentu daruak nian ne’ebé loke husi Primeiru-Ministru, no inklui mós, ba dala uluk, atividade sira ne’ebé liga ba esplorasaun iha rai-maran (onshore).
Primeiru-Ministru, iha ninia intervensaun iha serimónia abertura Simeira nian, konvida investidór sira hotu atu partisipa iha ronda kona-ba lisensiamentu sira ne’ebé ema hotu hein no atu “mai hamutuk ho Timor-Leste iha konstrusaun futuru ida ne’ebé di’ak liu ba nia povu”. Primeiru-Ministru hein mós “katak durante eventu loron rua nian ne’e, partisipante no delegadu sira hotu bele uza tempu ne’e ho di’ak hodi aumenta rede kontaktu sira ne’ebé di’ak liután ba parseria komersiál sira iha futuru”.
Taur Matan Ruak hateten “laiha dúvida katak ami-nia país, ne’ebé nakonu ho enerjia, bele sai interese maka’as ba Ita-Boot sira-nia empreza, no katak, ita hamutuk, bele kontinua hametin Timor-Leste nia dalan ba inovasaun no prosperidade”.
Iha ninia diskursu, Reprezentante Espesiál husi Governu ba Setór Petrolíferu no Xefe ba Ekipa Negosiasaun Ketan Tasik nian, Kay Rala Xanana Gusmão, afirma katak “ronda konsesaun lisensa sira nian ba prospesaun no esplorasaun petróleu nian, sei fó oportunidade di’ak tebes ba investimentu iha potensiál petróleu no gás ita-nia nasaun nian no hodi kria parseria foun sira, hodi nune’e, ita hamutuk bele dezenvolve poténsia minerál ne’e”.
Hodi Haree Diskursu hosi Primeiru-Ministru Taur Matan Ruak klika iha ne'e
