Sorumutuk Komisaun Interministeriál ba negosiasaun kona-ba apoiu finanseiru ba rekualifikasaun Aeroportu Internasionál Prezidente Nicolau Lobato
Komisaun Interministeriál ba negosiasaun kona-ba apoiu finanseiru ba rekualifikasaun Aeroportu Internasionál Prezidente Nicolau Lobato hala’o sorumutuk iha loron 24 fulan setembru tinan 2019, iha Palásiu Governu, iha Dili, atu analiza pontu situasaun husi planeamentu projetu ne’e nian.
Komisaun Interministeriál ne’e, ne’ebé harii iha loron 24 fulan-maiu tinan 2019, Ministru Estadu Prezidénsia Konsellu Ministrus maka prezide no kompostu husi Ministra Finansas iha ezersísiu, Ministru Negósius Estranjeirus no Kooperasaun, Ministru Obras Públikas no Ministru Transportes no Komunikasoins.
Ho objetivu atu fó apoiu tékniku ba Komisaun Interministeriál ne’e, maka harii ona, liuhusi Despaxu Primeiru-Ministru nian, Grupu Traballu Interministeriál ba Projetu Dezenvolvimentu Aeroportu Internasionál Nicolau Lobato. Grupu Traballu ne’e sei prepara planu dezenvolvimentu projetu ne’e nian, liuhusi koordenasaun ho departamentu governamentál sira seluk, hodi garante kumprimentu ba ezijénsia sira no rekizitu tékniku, sosiál, ambientál, finanseiru no jurídiku sira.
Durante sorumutuk husi Komisaun Interministeriál nian, Grupu Traballu ne’e halo aprezentasaun ida kona-ba planu asaun ba dezenvolvimentu rekualifikasaun aeroportu ne’e nian. Aleinde ne’e, aprezenta ona mós pontu situasaun husi progresu sira ne’ebé alkansa ona iha preparasaun planu diretór projetu nian no dada lia ho reprezentante sira husi instituisaun no ajénsia oin-oin.
Rekualifikasaun Aeroportu Internasionál Prezidente Nicolau Lobato nian, sei konta ho apoiu finanseiru husi Governu Japaun. Projetu ida-ne’e prevee aumenta pista, harii torre kontrolu foun ida, rekualifikasaun terminál pasajeiru nian no hadi’a dalan sira-ne’ebé fó asesu ba aeroportu ne’e. Pista ne’ebé daudaunne’e iha, ninia naruk mak metru 1850 no tékniku sira estuda hela opsaun oin-oin atu aumenta tan pista ne’e nia naruk, nune’e bele garante aviaun sira ne’ebé mak boot liu mós bele tuun. Durante períodu rekualifikasaun nian, sei garante katak aeroportu sei funsiona nafatin. Iha projetu ida-ne’e, aleinde husi Governu Japaun, Timor-Leste konta mós ho apoiu husi parseiru dezenvolvimentu nian sira seluk, hanesan Banku Dezenvolvimentu Aziátiku (ADB, sigla iha lian inglés), Banku Mundiál no Korporasaun Finanseiru Internasionál nian (IFC, sigla iha lian inglés).
Aleinde membru sira husi Komisaun Interministeriál, sira ne’ebé mak partisipa mós iha sorumutuk ne’e, tékniku sira husi Prezidénsia Konsellu Ministrus, Ministériu Finansas, Ministériu Transportes no Komunikasoins, Autoridade Nasionál Aviasaun Timor-Leste (ANATL) no Autoridade Aviasaun Sivíl Timor-Leste (AACTL, sigla iha lian portugés) nian.
