Governu Timor-Leste

Sekretáriu Estadu Juventude no Desportu (SEJD), Nélio Isaac Sarmento no  nia funsionáriu sira komemora loron internasionál Juventude ba dala ruanulu, ho tema “Edukasaun Transformadora” iha edifísiu East Timor Coffee Institute (ETCI), iha segunda-feira, loron-12 fulan agostu tinan 2019, iha munisípiu Ermera.

Atividade kulturál oioin de’it no kompetisaun téknika no diskursu públiku barak tebes maka realiza iha selebrasaun ne’e.

Sekretáriu Estadu Nélio Isaac Sarmento hateten ba joven sira katak ‘’selebrasaun ne’e nia objetivu maka hadi’ak joven sira nia moris no kontribui atu sira moris independente, hodi transforma sira-nia pensamentu liuhosi edukasaun no, nia hatutan mós katak importánsia hosi selebrasaun Loron Internasionál Juventude tanba iha loron-ne’e maka ita selebra loron-12 agostu, liuhosi rezolusaun Asembleia Jerál ONU iha 1999, hodi hatán ba rekomendasaun hosi Konferénsia Mundiál ba Ministru sira ne’ebé responsável ba Juventude, ne’ebé reuni ona iha Lisboa, iha loron-8 to’o loron-12 fulan agostu.

Tanba barakliu populasaun iha munisípiu Ermera mesak joven, tenke fó atensaun ba área edukasaun, iha eduksaun formál no informál. Edukasaun tenke hahú iha família no labele bandu atu labarik sira bá eskola.

Iha área edukasaun formál no informál, Governu buka atu hasa’e joven sira nia kapasidade liuhosi kursu formasaun akadémika no téknika no loke-dalan atu oinsá populasaun sira bele hetan asesu hodi lee livru atu, sira bele prepara-an di’ak liután hasoru dezafiu sira. Temi Sekretáriu Estadu.

Ema sira ne’ebé marka prezensa iha eventu maka Prezidente Autoridade Munisípiu Ermera, José Martinho dos Santos Soares, reprezentante hosi organizasaun Nasoes Unidas nian, PNTL, F-FDTL, estudante ETCI sira no funsionáriu sira SEJD nian.