Governu Timor-Leste

Loron 28 fulan-agostu tinan 2019 – Ministru Reforma Lejizlativa no Asuntus Parlamentares no Ministru Koordenadór Asuntus Ekonómikus no Ministru Turizmu, Komérsiu no Indústria Interinu, Fidelis Manuel Leite Magalhães, ohin hala’o enkontru ida ho ninia omólogu husi Zelándia Foun, Hon. Phil Twyford MP, Ministru Dezenvolvimentu Ekonómiku, Dezenvolvimentu Urbanu no Transportes, ne’ebé lidera delegasaun husi Zelándia Foun hodi partisipa iha komemorasaun sira Tinan 20 Konsulta Populár no INTERFET nian. Delegasaun husi Timor-Leste ne’ebé partisipa iha enkontru ne’e inklui Jacinto Rigoberto nu’udar Asesór Prinsipál MTCI nian.

Ministru Phil Twyford fó parabéns ba rezultadu hirak-ne’ebé ita-nia nasaun alkansa ona dezde referendu no hafoin independénsia no nia fó hanoin fali katak iha tinan 90 no tinan sira tuirmai nia rasik sai nu’udar ativista apoiante ida ba kauza povu Timor nian.

Ministru Fidelis Magalhães hato’o agradesimentu ba apoiu lubuk-ida ne’ebé ema Zelándia Foun sira fó ona ba ita-nia luta no Timor-Leste mós rekoñese asisténsia sira husi Zelándia Foun nian ba dezenvolvimentu nasionál. Ministru Interinu MTCI nian ne’e hatete katak kooperasaun bilaterál entre Timor-Leste no Zelándia Foun la’o di’ak tebetebes no nia aprezenta mós ba ninia omólogu prioridade sira Governu nian kona-ba diversifikasaun ekonomia.

Ministru Fidelis Magalhães subliña katak Turizmu no Indústria daudaun ne’e, nu’udar setór hirak ne’ebé Governu fó prioridade maka’as liu ba dezenvolvimentu ekonómiku no emprezariál, tanba iha setór sira-ne’e bele hetan rezultadu lais liu ba diversifikasaun. Dezenvolvimentu turizmu no setór emprezariál iha Timor-Leste sai ona hanesan prioridade ida husi kooperasaun bilaterál ho Zelándia Foun dezde tinan 2011.

Governu Zelándia Foun mós fó ona bolsa-estudu lubuk-boot-ida ba estudante timoroan sira hodi estuda iha universidade sira iha Zelándia Foun, durante tinan barak nia laran ona.

Ministru Fidelis Magalhães hatutan katak nia fó mós atensaun ba dezenvolvimentu komérsiu nian, ho prioridade ba prosesu adezaun nasaun ne’e ba Organizasaun Mundiál Komérsiu nian no hein katak dinamizasaun setór komersiál bele aprezenta rezultadu balu iha prazu médiu.

Ministru MCAE no MTCI interinu ne’e hatete katak kooperasaun bilaterál ho Zelándia Foun bele kontribui ba formasaun kuadru médiu no superiór sira ba setór Turizmu no aselera akizisaun know-how ka abilidade espesializadu ba tékniku nasionál nian sira.

Ministru Phil Twyford hatudu Zelándia Foun nia disponibilidade tomak hodi hametin kooperasaun iha área Turizmu no iha área sira seluk, inklui dezenvolvimentu urbanu no teknolojia dijitál sira, no sira seluk tan.