Governo no CNJTL Sei Servisu Hamutuk Iha Área Edukasaun
Ministra Edukasaun, Juventude no Desportu (MEJD), Dulce de Jesus Soares, hasoru malu ho ho Prezidente Konsellu Nasionál Juventude Timor-Leste (CNJTL), Maria Dadi Magno, iha salaun konferénsia MEJD, Villa Verde, Dili, iha loron 15 fulan-jullu tinan 2019,
Ministra Edukasaun, Dulce de Jesus, esplika, objetivu husi reuniaun ne’e, oinsá atu haree fila-fali programa Governu daualu kona-ba servisu hamutuk ministériu nian, liu husi Sekretária Estadu Juventude no Desportu ne’ebé define planu nasionál ba juventude no mós estabelesimentu Komisaun Nasionál Juventude ne’ebé mak sei lidera husi Primeiru-Ministru. Komisaun ida ne’e importante tanba liu husi komisaun ne’e bele ajuda juventude sira ne’ebé hetan difikuldade.
Ministra Dulce mós informa tan katak, iha biban ne’e deside mós hanoin ruma, oinsá parte rua atu servisu hamutuk iha área edukasaun nian, liu husi juventude sira ne’ebé hamahan an iha CNJTL, sei kontribui hodi halo monitorizasaun ba eskola sira no mós halo atividade estrakurrikulár hanesan formasaun karatér ba estudante sira.
Prezidente CNJTL reforsa tan katak, sorumutuk ne’e haree mós programa ne’ebé mak CNJTL rekomenda ba Governu tanba CNJTL hanesan parseiru estratéjiku Governu nian.
Maria Dadi Magno, haktuir tan katak, CNJTL sei kontinua esforsu hodi servisu hamutuk ho Governu hodi harii komisaun ne’e no mós kompromisu CNJTL nian atu estabelese formasaun ka eskola lideransa nian
“Elójia mós komprimisu ministériu nian ne’ebé sei involve CNJTL iha programa dezenvolvimentu edukasaun nian no husu mós ba Governu atu kontinua fó apoiu ba asosiasaun juventude sira ne’ebé sai parseiru Governu nian,” afirma Prezidente CNJTL.
