Timor-Leste Haruka Delegasaun ba Enkontru Tékniku iha Sekretariadu ASEAN
Timor-Leste sei haruka delegasaun ida kompostu husi ofisiál nain-20 hodi partisipa iha vizita estudu ba iha Sekretariadu ASEAN iha Jakarta. Ida ne’e mak ba dala-uluk Timor-Leste haruka delegasaun ida ne’ebe bo’ot hodi ba vizita Sekretariadu ASEAN no koalia kona-ba programa servisu kompriensivu ASEAN nian.
Lidera no koordena husi Diresaun-Jerál ba Asuntus ASEAN iha Ministériu Negósius Estranjeirus no Kooperasaun, delegasaun ne’e kompostu husi Diretór-Jerál no Pontu Fokal sira husi liñas-ministeriais ne’ebe halo servisu liga ho adezaun ba ASEAN iha pilar tolu: Pilar Ekonomia, Pilar Polítika no Seguransa, no Pilar Sósio-Kulturál.
Partisipante sira sei aranka husi Dili iha loron Sábadu, 20 Jullu 2019 hodi atende enkontru ne’ebe marka ona ba loron 22-24 Jullu 2019. Sira sei koalia kona-ba asuntu importante barak, inklui mos aprende kona-ba ASEAN nia enkuadramentu intitusionál no estrutura orgánika, prosesu foti desizaun, instrumentu no akordu legal, no kooperasaun téknika.
Enkontru ne’e akontese hafoin Timor-Leste nia Ministru Negósius Estranjeirus no Kooperasaun, Dionísio Babo Soares, simu konvite hodi ba halo enkontru kortezia ho Sekretáriu-Jerál ASEAN, Dato Lim Jock Hoi, iha Jakarta iha Maiu 2019. Parte rua ne’e koalia no mai ho konkordánsia, no servisu hamutuk hodi realiza vizita importante ne’e.
Adezaun ba ASEAN sai hanesan prioridade nasionál no estratéjika ba Timor-Leste. Adezaun ne’e sei la fo deit benefísiu ba Timor-Leste nia ekonomia nasionál, maibé sei kontribui mos ba ekonomia Estadu Membru ASEAN nian no promove dame no estabilidade iha rejiaun ASEAN.
Tinan ne’e marka aniversáriu ba dala-8 dezde Timor-Leste espresa nia interese hodi sai membru ASEAN. Komesa kedas husi nia aplikasaun formál iha 2011, Timor-Leste hala’o ona servisu tékniku barak hodi asegura katak nasaun ne’e prontu atu sai membru plena ASEAN.
