Governu Timor-Leste

Delegasaun Ministériu Finansas  kompostu hosi Diresaun Jeral Tezouru, Diresaun Jeral Finansas Estadu, Autoridade Tributaria no  Autoridade Aduaneira hala’o sorumutu ho Autoridade RAEOA- ZEESM Oecussi iha edifisiu Autoridade Aduaneiru Palaban, loron 8 Jullu 2019.

Sorumutu ne’e hetan partisipasaun husi Prezidente Autoridade RAEOA-ZEESM, Dr. Mari Alkatiri hamutuk ho estrutura RAEOA nian nu’udar kompromisu Governu Sentral  bazeia ba karta  husi Prezidente Autoridade ZEESM - RAEOA ba Primeiru-Ministru, Taur Matan Ruak no mós atu kompleta no implementa artigu 20 Lei no.2/2019 loron 7 fulan-fevereiru kona-ba Orsamentu Jerál Estadu tinan 2019.

“Ohin delegasaun husi Ministériu Finansas mai iha RAEOA atu hatutan deit koordenasaun ne'ebé ami halo iha loron 21 fulan-marsu tinan 2019 kona-ba prosesu no progresu atu implementa reintegrasaun ezekusaun orsamentu RAEOA ZEESM ba iha sistema jestaun finanseira ne'ebé agora daudaun Governu sentral utiliza hela” hateten Diretór Unidade Sistema Integradu Informasaun Jestaun Finanseira Joanico Pinto iha sesaun abertura nu’udar  reprezentante Ministra Finansas ein ezersisiu no atual Vice Ministra Finansas Sara Lobo Brites ne’ebe mak labele marka prezensa iha sorumutu ne’e tanba partisipa hela sorumutu Konsellu Ministru Ekstraordinariu hahu’u husi 8 – 9 Jullu 2019 iha Palásiu Governu.

Matéria aprezentasaun  ne’ebé hato’o husi delegasaun Ministériu Finansas nian mak  rekezitus no progressu servisu sira ne’ebé Ministériu Finansas hamutuk ho Sekretariadu Rejionál Finansas RAEOA halo tiha ona liu-liu kona-ba  integrasaun ezekusaun orsamentu RAEOA ba sistema GRP, utilizasaun  sistema SIGTAS ba Impostu Rejionál RAEOA no mós halo upgrated (aumenta velosidade) ba Sistema ASYCUDA . Kuntinuasaun husi sesaun aprezentasaun, aprezenta mós prátika no prosedimentu  ne’ebé  Ministériu Finansas utiliza  hodi hala’o jestaun no kontrolu ba ezekusaun OJE  liga ho jestaun finansa públika, hanesan siklus no prosesu Orsamentu Jerál Estadu, regra no siklu prosesu pagamentu no relatóriu kontabilidade, regra no prosesu pagamentu impostu no ikus-liu mak halo aprezentasaun kona-ba prosedimentu  iha Alfandega.

Sekertaria Jerál Finansas RAEOA ZEESM Leonia da C. Monteiro iha ninia intervensaun durante sorumutu  rekoñese katak hahu’u 2015 RAEOA  husu hodi  aplika sistema Free Balance  maibe ikus mai labele realiza tanba kustu ba aplikasoins ne’e boot tebes.

“"Oras ne’e koordenasaun ho Ministeriu Finansas  la'o diak tebes no hamosu ona esbosu ida para bele kria sistema informátika ida para bele mosu trasparansia ba iha Portal Governu."” hateten Leonia ba ekipa husi Ministériu Finansas durante sorumutu nee hala’o.

Objetivu prinsipal hosi aprezentasaun kona-ba servsiu hirak ne’e relasiona ho implementasaun ezekusaun orsamentu autoridade RAEOA ZEESM iha sistema Jestaun Finansas Públika ka Jestaun Finanseira ne’ebé hanaran  GRP, inklui mós  atualiza sistema impostu  hanesan SIGTAS no aumenta velosidade ba sistema ASYCUDA World  ne’ebé dadaun ne’e utiliza husi Alfandega.

 Tuir ajenda ne’ebe mak iha ohin 9 Jullu 2019 delegasaun husi Ministériu Finansas kuntinua halo vizita ba edifisiu sira ne'ebé sei sai fatin implementasaun sistema GRP, sistema Autoridade Tributaria no sistema Autoridade Aduaneira.