Akordu Husi Parseria Estratéjia Entre Governu Timor-Leste ho Governu Territóriu Norte Austrália
Timor-Leste no Territóriu Norte Australia asina ona ohin, iha Palásiu Governu, iha Dili, Akordu Parseria Estratéjika ida, kona-ba implementasaun kuadru estratéjiku foun ida ba kooperasaun bilaterál. Akordu ne’e sei vigora to’o tinan 2022, iha altura ida-ne’ebé sei hetan fila-fali revizaun no atualizasaun, exetu bainhira parte ida ka parte rua ne’e hakotu akordu ne’e liuhusi karta ida.
Timor-Leste no Territóriu Norte Austrália, partilla istória naruk ida kona-ba kooperasaun no ligasaun ida ne’ebé forte entre povu rua, ne’ebé hahú uluk ona molok independénsia Timor-Leste nian no autonomia Governu Territóriu Norte nian.
Akordu ne’e nia objetivu mak atu rekoñese no haforsa relasaun entre Timor-Leste no Territóriu Norte ho objetivu atu fó kuadru jerál ida hodi orienta no avalia esforsu bilaterál.
Akordu-Kuadru Estratéjiku ne’e sai mós nu’udar kompromisu hamutuk ida ne’ebé forte kona-ba futuru relasaun entre Timor-Leste no Territóriu Norte, atu implementa asaun kolaborativa nian sira ba benefísiu hamutuk sidadaun no komunidade sira nasaun rua ne’e nian. Akordu kona-ba Parseria ne’e, asina husi atuál Ministru Estadu Prezidénsia Konsellu Ministrus no Ministru Negósius Estranjeirus no Kooperasaun iha ezersísiu, Agio Pereira, nu’udar reprezentante Governu Timor-Leste nian no Onoravel Michael Gunner MLA, Xefe Territóriu Norte nian.
