Governu Timor-Leste

Ministériu Finansas (MF), liuhosi Diresaun Jerál Tezouru (DJT) no Sentru Kapasitasaun Jestaun Finansas Públikas (SKJFP), finaliza ona, iha loron 14 fulan-juñu 2019, formasaun ida iha Área Kontabilidade no Relatóriu Finanseiru Setór Públiku ba funsionáriu finansas nian sira hosi Munisípiu Baukau, Lautein, Vikeke no Manatutu.

Formasaun ne’e hala’o husi loron 10 to’o 14 fulan-juñu tinan 2019, no sai nu’udar kontinuasaun hosi programa idéntika ne’ebé antes ne’e hala’o tiha ona iha parte Rai-klaran no Oeste.

Ana da Gloria Freitas, partisipante ida husi Munisípiu Baukau hateten: “Ha’u sente kontente ho formasaun ida-ne’e, tanba ami funsionáriu finansas nian husi Baukau, durante ne’e seidauk hetan formasaun espesífiku iha área Kontabilidade no Finansas. Formasaun durante semana ida ne’e bele ona tulun ami responde difikuldade hirak ne’ebé maka ami enfrenta. Maske la barak maibé bele responde ona”.

Formasaun ne’ebé hala’o ho fundus hosi Uniaun Europeia ne’e, realiza husi Ministériu Finansas liuhosi Sentru Kapasitasaun Jestaun Finansas Públika (SKJFP) no Diresaun Jerál Tezouru, liuhusi serbisu hamutuk ho Ministériu Administrasaun Estatál (MAE). Ho konkluzaun formasaun ida-ne’e nian maka remata faze dahuluk ba munisípiu hotu-hotu.

Diretór Finansas husi munisípiu Lautein, Hilário Rui Manuel, mós sente orgullu ho formasaun ne’e tanba bele ona responde difikuldade sira ne’ebé durante ne’e sira enfrenta iha terrenu no husu atu aumenta loron formasaun nian. “Formasaun iha loron 5 ne’e seidauk sufisiente no ami husu nafatin asisténsia no apoiu permanente, no se bele treinamentu hanesan ida-ne’e bele realiza dala ida tan, atu nune’e ami bele iha koñesimentu di’ak liu iha área kontabilidade no finansas”.

Partisipa iha formasaun ne’e funsionáriu sira husi área finansas nian hamutuk na’in 16 Munisípiu Baukau, Vikeke, Lautein no Manatutu, ne’ebé bainhira formasaun ne’e remata, sei simu sertifikadu nivel nasionál iha jestaun finansas públikas. Formasaun ne’e uza téknika oin-oin, ne’ebé inklui aprezentasaun multimedia (slide show), manuál no tutoriál liuhusi vídeo.

Nu’udar resposta ba preokupasaun husi partisipante sira-ne’e, reprezentante husi Sentru Kapasitasaun Jestaun Finansas Públika (SKJFP) Ministériu Finansas, Valdomar Lopes, garante katak “formasaun ne’e la hotu de’it iha ne’e, faze tuirmai sei iha, ne’ebé foka liu-liu ba área jestaun finanseiru nian. Responsavel ne’e informa mós katak SKJFP sei halo monitorizasaun tékniku sira-ne’e nia serbisu atu hatene tuir partisipante sira-nia progresu hafoin hetan formasaun. “Espera simu tiha treinamentu ne’e ita-boot sira-nia viajen ba Dili ne’e menus ona no mós ita boot sira-nia dezempeñu servisu bele halo liuhusi relatóriu kada trimestre bazeia ba regra sira ne’ebé hetan hosi treinamentu ne’e” responsavel ne’e konklui iha ninia mensajen enserramentu formasaun ne’e nian.