Governu Timor-Leste

Ministru Reforma Lejizlativa no Asuntu Parlamentár (MRLAP), Fidelis Manuel Leite Magalhães akompaña hosi Sekretáriu Estadu ba Komunikasaun Sosiál (SEKOMS), Merício Juvenal dos Reis “Akara” hala’o sorumutu ho Diretór no na’in ba Media sira, iha Palácio do Governo Dili, loron 16 fulan-maiu 2019.

Objetivu hosi sorumutu ne’e atu hametin liután kooperasaun entre Governu no Órgaun Komunikasaun Sosiál sira iha Timor-Leste no mós atu fahe informasaun kona-ba atividade ka programa Governu daualuk nian.

Tuir MRLAP, Fidelis Magalhães, katak, atu re-afirma fila-fali importánsia papél media nian iha konstrusaun nasaun, iha prosesu dezenvolvimentu ida ne’e, ita refleta la’ós de’it iha diskursu maibé prioridade ne’ebé maka VIII Governu sei hatu’ur tantu iha programa no Orsamentu Jerál Estadu liubá no mós iha tinan 2020. Iha 2020 área prioritária no akordu konforme orientasaun primeiru-Ministru iha aprovasaun katak media komunikasaun sosiál okupa fatin ida ne’ebé aas tebes hanesan prioridade Estadu nian

Ministru ne’e mós hatutan tan katak, Estadu tenke pro-ativu kontribui ho dalan ne’ebé forte liután atu bele hametin sentidu pertense ka sentidu nasaun, ida ne’e prosesu ida ne’ebé Governu sei la-halo sein servisu hamutuk ho ita-boot sira hosi órgaun Komunikasaun Sosiál ho media sira. Ne’e esensiál ba integridade soberania hosi ita-ninia nasaun ho Estadu ne’e rasik katak, ita aumenta espíritu ida katak ida ne’ebé halo belit hakesir ita hanesan nasaun ka Estadu ita só presiza partisipasaun ida ne’ebé klaru iha meius ka media komunikasaun Sosiál.

Governu kontinua servisu ho ita-boot sira parseria simbólika ida entre Governu ho ita-boot sira no konsidera nafatin katak ita -boot sira iha responsabilidade no kontribuisaun iha dezenvolvimentu ne’e rasik, tenik Magalhães.

Nune’e mós Sekretáriu Estadu ba Komunikasaun Sosiál, Mericio Juvinal dos Reis “Akara” informa ba Diretór no na’in ba media sira katak, Governu iha kompromisu atu kontinua apoiu instituisaun Media sira maibé sei presiza Matadalan ida para atu jere prosesu ne’e.

SEKOMS mós sei tau prioridade ba Lei Rádiufuzaun (undang-undag Penyiaran), no sei lansa mós programa foun iha tinan ida ne’e hanaran “Naroman ba Suku” katak dada besik informasaun hosi nasionál ba komunidade sira iha suku no komunidade sira bele hato’o sira-nia preokupasaun ka obstákulu balun atu nune’e bele lansa mós iha media sira iha nivel nasionál, tanba ne’e Sekretáriu Estadu mós husu ba Diretór no na’in Media sira atu kolabora hamutuk ba prosesu ida ne’e.

SEKOMS sei kria mós Sentru informasaun ba iha Suku sira, hodi kanaliza informasaun liuhosi Jornál, Revista no dokumentu informativu importante balun ne’ebé liga ba dezenvolvimentu.

Partisipa iha enkontru ne’e, reprezentante Timor-Gap, Xefe Gabinete, Diretór DNDI, Diretór CRC, Xefe departamentu sira iha DNDI nian, Diretór no Na’in ba Media sira.