Governu Timor-Leste

Ministériu Justisa (MJ) no Sekretária Estadu Komunikasaun Sosiál (SEKOMS) servisu hamutuk ho UNICEF, organiza iha loron 30 fulan-abríl 2019 sorumutu konsultasaun kona-ba rejistu moris, iha salaun Otél Vilaverde Díli.

Reprezentante SECOMS, Diretór Centru Rádio Comunitário (CRC), Abel da Conceicão, hateten sorumutu ne’e buka maneira ba implementasaun programa rejistu moris ne’ebé mak di’ak liu no sosiedade sira-nia asesu ba programa ne’e aumenta iha Timor-Leste.

“Iha obstákolu balun ne’ebé mak ita-nia komunidade sira enfrenta, tan ne’e, husu ba jestór rádiu komunidade sira, iha ita-bot sira-nia programa bele fó espasu ba ita-nia lideransa munísipiu, autoridade lokál sira no liuliu Ministériu Justisa (MJ) no Ministériu Saúde (MS) bele asesu ba rádio hodi hato’o mensajén kona-ba polítika rejistu moris ba labarik sira”.

Ita-nia komunidade sira iha área rurál bele asesu no kompreende importánsia hosi  rejistu ba ita nia oan sira. Espera depoizde implementa prorama ne’e iha tinan balun mai presentanze rejistu ba ita nia oan sira sae”, haktuir Diretór CRC.

Tuir reprezentante Ministériu Justisa,Vitor Neto  katak, rejistu moris hanesan direitu ida ne’ebé uluk liu ita tenke fó ba labarik sira, tanba labarik sira wainhira moris tenke iha naran no mós iha ema ida nu’udar inan ho aman atu proteje sira.

“Depois ratifikasaun konvensaun direitu ba labarik iha 2003, iha tinan 2004 Ministáriu Justisa koopera ho UNICEF hala’o  kampaña dahuluk kona-ba importánsia rejistu moris  no konsege halo rejistu iha munisípiu hotu-hotu. Estadu Timor-Leste liuhosi governu sei esforsu nafatin ba programa ne’e, no kontinua koopera ho UNICEF no organizasaun naun Govermentál sira seluk hanesan, Chilfund,WorldVision no União Europeia.

Reprezentante no adjuntu UNICEF iha Timor-Leste, Scoot Whoolery, esplika, ho sertidaun moris RDTL fó prova kona-ba labarik nia identidade loloos no hetan direitu báziku nian. Labarik ne’ebé mak la-rejistu wainhira moris mai signifika nia iha perigu nia laran, tanba ema bele haluha nia iha nia sosiedade nia laran no la hetan direitu ba nia identidade ofisiál ida.

Ajduntu ne’e salienta, sistema rejistu ne’ebé mak lalais ho efisiénsia presiza esforsu hamutuk no kolaborasaun entre ministériu hirak hanesan Ministériu Saúde, Ministériu Edukasaun Juventude no Desportu, MJ, MS, Ministériu Administrasaun no Estatal (MAE) no mós  SECOMS.

“UNICEF prontu servisu hamutuk ho ministériu relevante sira hodi asegura rejistu moris ba  labarik sira hotu hodi hetan sertidaun moris RDTL”, haktuir adjuntu Scoot Whooler.

Marka prezensa iha sorumutu ne’e reprezentante MAE, reprezentante MS, Rádiu komunidade hosi munisípiu hotu, xefe suku sira no inklui parteira sira hosi munisípiu rua Bobonaro no Likisá.