Governu Hala'o Sorumutu ho Equipa hosi DLA Piper
Primeiru-Ministru, Taur Matan Ruak, ohin, loron 23 fulan-maiu tinan 2019, dirije sorumutuk ida ho ekipa peritu sira hosi DLA Piper iha Palásiu Governu, iha Dili, ho prezensa husi Ministru Estadu Prezidénsia Konsellu Ministrus, Agio Pereira. Objetivu hosi sorumutuk ne’e mak atu avalia ligasaun área no opsaun estratéjika sira ne’ebé adekuada ba tempu badak, médiu no tempu naruk, ne’ebé bele disponivel ba Governu, atu nune’e bele asegura transporte aéreu no evita izolamentu ne’ebé merkadu competitivu indústria transporte aérea niansira impoin.
DLA Piper hanesan firma advokasia globálidaho advogadu sira iha nasaun 40 resin iha Amérika, Europa, Médiu Oriente, Áfrika no Ázia-Pasífiku no ho kliente sira iha mundu tomak.
Sorumutuk ne’e konta ho partisipasaun hosi peritu na’in haat:Stephen Webb,parseiru responsavel ba relasionamentu ho Timor-Leste, Stewart Winspear,fundadór no konsultór ba DLA Piper nian, Peter Ashford, konsultór DLA nian no Catherine McDougall,asosiada senior,ne’ebé iha esperiénsia barak iha área indústria aviasaun nian.
Importante mós atu hanoin fila-fali katak, Governu japonés fó ona apoiu ida ho valór US$ millaun 43 hodi apoia dezenvolvimentu terminál Aeroportu Internasionál Prezidente Nicolau Lobato, iha Dili. Projetu ne’e tenke remata no enkuadra iha planu diretór, ne’ebé Korporasaun Finanseira Internasionál – IFC (International Finance Corporation) termina daudaun ona.
