Governu Timor-Leste

Sekretáriu Estadu Ambiente, Demétrio de Amaral de Carvalho, no Diretór Fundasaun Carbon Offset Timor (COTI), Alexandre Rosa Bruno Sarmento, asina ona Nota Entendimentu (NE), iha kinta, loron 25 fulan-abríl tinan 2019, iha Salaun Sekretaria Estadu Ambiente nian, Mandarin, Dili.

Objetivu prinsipál hosi asinatura ne’e mak atu estabelese plataforma komún ida kona-ba entendimentu entre Governu, liuhosi Sekretáriu Estadu Ambiente, no Fundasaun Carbon Offset Timor hodi promove kolaborasaun iha kestaun ambientál iha área fiksasaun karbonu (Carbon Sequestration). Atividade ne’e hala’o liu-hosi atividade reflorestasaun komunitáriu.

Sekretáriu Estadu Ambiente hateten katak atividade ne’e la’ós foin hahú agora, ho asinatura Memorandu Entendimentu entre Sekretaria Estadu Ambiente no Fundasaun Carbon Offset Timor (COTI) ida-ne’e, maibé Fundasaun ne’e hala’o tiha ona atividade ne’e kuaze tinan 10 ona iha Timor Leste. Nune’e, asinatura ME ida-ne’e nian, nia objetivu mak atu hadi’a servisu sira iha terrenu, tanba to’o ohin loron COTI kuda ona ai-hun rihun atus rua resin. Atividade ida-ne’e hetan susesu signifikativu, no 60% husi ai-oan sira ne’ebé kuda, boot daudaun ona no ohin ita bele dehan katak ai-hun rihun atus resin maka boot daudaun ona no buras iha ita-nia rain.

SEA hateten mós katak “programa ida hanesan ne’e nu’udar asaun ho dimensaun boot, ne’ebé hakarak habelar karbonu florestál (Forest Carbon). Asaun sira-ne’e aliña duni ho Governu nia esforsu atu halo Timor sai saudavel no matak liu. Ita hatene katak degradasaun florestál iha Timor sei aas, ne’ebé atinje porsentu 1.1% husi ai-laran kada tinan. Se ita-nia ai-laran hamutuk 1.1% mak sofre degradasaun tinan-tinan, ida-ne’e signifika katak ita lakon ai-laran hamutuk ektare 10.000 resin iha territóriu laran tomak.

Demétrio Amaral de Carvalho hatutan: “Ita halo esforsu barak tebes, maibé rezultadu ne’ebé iha uitoan de’it, tanba ne’e, Sekretaria Estadu Ambiente ne’e hatene katak, serbisu hamutuk ho entidade sira ne’ebé iha ona esperiénsia hanesan Fundasaun Carbon Offset Timor ne’e pozitivu tebes, tanba sira iha ona esperiénsia iha terrenu, sira aprende husi erru no mós aprende husi prátika husi maluk sira seluk. Tanba ne’e, hodi Sekretaria Estadu Ambiente nia naran, ne’ebé iha ne’e reprezenta Governu, ha’u hakarak fó parabéns ba esforsu husi ekipa Fundasaun Carbon offset Timor (COTI), ne’ebé introdús ona prátika foun sira kona-ba kuda ai-horis atu fiksa karbonu ne’ebé maihusi ita ema nia atividade.

Esforsu ida-ne’e, pozitivu tebes. Ha’u hein katak bele da’et mós ba komunidade sira seluk. Ohin loron, atividade ne’e ita halo iha Soibada no Laklubar, maibé ha’u-nia hakarak mak iha tinan balu nia laran, bele mós hada’et tan ba fatin sira ne’ebé presiza mós reflorestasaun. SEA sempre prontu atu fó nia apoiu.

Iha fatin hanesan, Diretór Fundasaun Carbon Offset Timor (COTI), Alexandre Rosa Bruno Sarmento, hateten katak atividade fiksasaun karbonu hosi reflorestamentu komunitária ne’e importante tebes tanba ai-horis sira xupa gás sira ne’ebé fó  ba atmosfera liuhusi fábrika sira iha nasaun dezenvolvidu no industrializadu sira, no liuhosi atividade ekonómika prinsipál rua: Produsaun no Konsumu. Bainhira iha emisaun gás ho efeitu estufa, liu-liu dióksidu karbonu (Co2), ba atmosfera, iha kuantidade boot, ida-ne’e kontribui ba alterasaun klimátika. Ai-horis sira iha kapasidade atu xupa tiha gás ne’ebé bele kria poluisaun ba atmosfera, no, nune’e hamoos fali atmosfera hosi gás estufa sira-ne’e.

Atividade fiksasaun karbonu (Carbon offset ka Carbon Sequestration) ne’e hala’o husi fundasaun COTI iha Munisípiu Manatutu, iha postu administrativu rua, Laklubar no Soibada, dezde tinan 2010 to’o oras ne’e. Durante besik dékada ida ona mak COTI servisu hamutuk ho to’os-na’in kuaze 300 iha postu administrativu rua ne’e hodi kuda ai-horis hanesan, Mahoni, Ai-kakeu, Samtuku, Teka-metan, Teka-mutin no Ai-kameli. To’o oras ne’e, ai-horis hamutuk 170.00 mak kuda ona no boot daudaun ona, no fó benefísiu direta ba komunidade iha Postu Administrativu rua ne’e.