Governu Timor-Leste

Primeiru-Ministru Taur Matan Ruak, ohin loron-23 fulan abril 2019 reuni iha Palácio Governu, iha Díli, ho Konsellu Administrasaun hosi Fundu Infraestrutura nian (CAFI) hodi koalia no analiza pontu situasaun hosi projetu sira Fundu Infraestrutura (FI) nian, ne’ebé daudauk ne’e la’o-hela no defini projetu prioritáriu sira ba tinan 2020, hodi garante katak projetu hirak-ne’e kumpri prosedimentu legál no obra sira iha duni kualidade.

Durante reuniaun membru sira hosi CAFI no Primeiru-Ministru analiza tiha projetu sira fundu infraestrutura ne’ebé daudauk ne’e la’o-hela ka iha ona prosesu avaliasaun no estudu liuliu, projetu ba Porto Tibar ne’ebé inseridu ona, reabilitasaun ba estrada rurál sira liuhosi programa “Estradas para o Desenvolvimento” (Roads for Development - R4D) no Programa ba Edifísiu Públiku ho kontrusaun ba sede foun Institutu Jestaun ba Ekipamentu (IJE).

CAFI nia responsável sira hamutuk ho governu diskute mós kona-ba impaktu hosi infraestrutura ba ekonomia nasionál liuliu, bainhira atu loke servisu liuhosi envolve empreza nasionál kiik, média no empreza boot sira no projetu komunitáriu, aleinde uza matéria-prima lokál bainhira dezenvolve projetu sira ne’e hodi, garante katak projetu hirak-ne’e kona loos ho komunidade lokál sira liuhosi hasae postu servisu no hadi’ak kondisaun moris komunidade sira nian no, nune’e de’it, maka populasaun sira bele hela hakmatek iha ida-idak nia munisípiu no osan bele sirkula di’akliu iha rai-laran.

CAFI kompostu hosi nia Prezidente, Ministru Planeamentu no Investimentu Estratéjiku en ejersísiu, Agio Pereira no membru seluseluk tan Konsellu Administrasaun nian, Ministra Finansa en ejersísiu Sara Lobo Brites, Ministru Obras Públikas Salvador Soares dos Reis Pires no Ministru Transporte no Komunikasaun José Agustinho da Silva

Governu estabelese tiha Konsellu Administrasaun hosi Fundu Infraestrutura hanesan órgaun ezekutivu ho autoridade atu deside kona-ba matéria sira ne’ebé relasiona ho projetu sira hosi Fundu Infraestrutura nian, nuudar instrumentu finanseiru ne’ebé harii ona iha tinan 2011 ho objetivu fó apoiu ba projetu estratéjiku sira hodi reforsa hasae ekonomia Timor-Leste nian, fasilita dezenvolvimentu infraestrutura no  proviziona fonte finanseiru ba projetu sira hanesan estrada no ponte, aeroportu no portu marítimu, fornese bee no ahi, edukasaun no saúde, turizmu no projetu boot sira seluk tan ne’ebé ho orsamentu liu dólar millaun ida.

Sustentabilidade hosi Fundu Infraestrutura liga diretamente ba prioridade estratéjiku sira atu dezenvolve ekonomia, ho impaktu sosiál no ambientál, ne’ebé la’o sorin-sorin ho objetivu sira Dezenvolvimentu Sustentável no Planu Estratéjiku Dezenvolvimentu 2011 – 2030.

Aleinde Primeiru-Ministru no membru sira hosi CAFI, marka mós prezensa iha enkontru ne’e maka Ministru Reforma Lejislativa no Asuntu Parlamentar, Fidelis Manuel Leite Magalhães, Diretór Sekretariadu ba Grandes Projetos (SGP), Krispim Fernandes, Diretór-Jeral hosi Autoridade Nasionál Desenvolvimento (ADN), Samuel Marçal, Diretór-Jeral Komisaun Nasionál Aprovizionamentu, Aniceto do Rosário no Prezidente TimorGap nian, Francisco Monteiro.