Governu Timor-Leste

Governu Timor-Leste, liuhusi Sekretáriu Estadu ba Komunikasaun Sosiál (SEKOMS), Merício Juvinal dos Reis ‘Akara’, entrega ona apoiu finanseiru, ne’ebé maihusi kategoria orsamentál transferénsias públikas, ba empreza públika Rádiu no Televizaun Timor-Leste (RTTL,EP.). Serimónia entrega nian ne’e hala’o iha tersa, loron 2 fulan-abríl tinan 2019, iha Palásiu Governu.

Sekretáriu Estadu ne’e hatete katak “apoiu ne’ebé Governu fornese ba RTTL, ho valór totál millaun 1,6 dolar amerikanu, husi valór ida ne’e, iha faze dahuluk sei entrega dolar amerikanu rihun atus sia ualunulu, ne’ebé sei fó dalan ba instituisaun ne’e hodi hala’o di’ak liután ninia misaun no responsabilidade”.

”Sai nu’udar Governu Konstitusionál VIII ninia kompromisu ida mak atu kontinua fó apoiu no halo kolaborasaun ho RTTL no asegura asesu ba informasaun iha territóriu tomak”, Akara salienta.

Durante enkontru ne’e, Sekretáriu Estadu mós fó-sai katak “Governu iha ona planu atu harii edifísiu foun ida ba RTTL, iha tinan oin, ne’ebé sei lokaliza iha Ai-mutin, Dili” no sei harii mós “torre tranzmisaun televizaun nian foun hamutuk hitu, iha área ne’ebé identifika ona hodi fó asesu ba informasaun ba populasaun husi territóriu nasionál tomak”.

Prezidente RTTL, EP., Francisco Gari, hafoin enkontru ne’e, hateten katak “osan ida-ne’e sei uza hodi sustenta nesesidade RTTL nian, liuliu atu sosa lalais ekipamentu, hodi troka sasán hirak ne’ebé aat bainhira bee sa’e tanba udan boot iha fulan-marsu liubá. Aleinde ne’e, osan ne’e balu sei uza ba dijitalizasaun dokumentál no ba preparasaun konstrusaun edifísiu foun no ba torre tranzmisaun nian ne’ebé RTTL presiza harii iha zona estratéjika sira atubele habelar área kobertura nian no hodi fó dalan ba  asesu informasaun ba komunidade hotu husi territóriu nasionál”.