Governu Timor-Leste

Vise-Ministru ba Dezenvolvimentu Estratéjiku Saúde (VMDES), Bonifácio Mau-Coli dos Reis, lansa ona, iha kinta, loron 28 fulan-marsu ne’e, iha postu administrativu Bobonaru nian, kampaña ALFA - Área La Soe Fo’er Arbiru, ne’ebé tama iha Planu Asaun  Komunidade nian, kona-ba Saneamentu no Ijiene. Ida ne’e hanesan ba dala haat maka, liuhusi kampaña ida ne’e, aldeia sira iha munisípiu Bobonaru, hetan distinsaun hanesan aldeia  ALFA.

Kampaña ne’e buka atu sensibiliza populasaun kona-ba risku husi soe fo’er boot arbiru, hodi insentiva populasaun atu halo sentina sira no deklara sira-nia aldeia hanesan zona ALFA.

Governu Timor-Leste ratifika ona Polítika Nasionál kona-ba Saneamentu Báziku, liuhosi Rezolusaun n. 8/2012 loron 14 fulan-marsu, ne’ebé define papél no responsabilidade sira Ministériu ida-idak nian, ho tema “Timoroan sira saudavel no moris iha ambiente ne’ebé moos no ijiéniku”.

Vise-Ministru ne’e, iha ninia diskursu, hatete katak “atu atinje objetivu sira hosi Planu Estratéjiku Dezenvolvimentu (PED) 2011-2030, liuliu Planu Estratéjiku Nasionál Setór Saúde nian (PENSS) 2011-2030, objetivu ne’ebé tama ona iha programa Governu VIII nian no Objetivu sira husi Dezenvolvimentu Sustentavel (ODS), Governu serbisu hamutuk ho ajénsia internasionál sira hanesan Fundu Internasionál Emerjénsia ba Infánsia Nasoins Unidas nian (UNICEF, sigla iha lian inglés), Organizasaun Saúde Mundiál, Asosiasaun ba Promosaun Umana no ONG PLAN Internasionál hodi implementa projetu ne’e, ne’ebé alkansa ona zona ALFA iha parte lubuk ida territóriu nasionál”.

Iha okaziaun ne’e, ofisialmente inaugura ona mós sanitáriu komunitáriu sira ne’ebé harii iha ámbitu Loron Mundiál ba Instalasaun Sanitária sira, ne’ebé selebra ona iha loron 19 fulan-novembru no entrega ona mós sertifikadu ba Xefe Suku no Xefe Aldeia sira ne’ebé asume kompromisu atu habelar no implementa deklarasaun ALFA iha munisípiu ne’e atubele alkansa estatutu ALFA iha tinan 2020.

Serimónia ne’e konta ho apoiu maka’as hosi autoridade administrativa, autoridade lokál, estudante sira no populasaun lokál.