Governu Timor-Leste

Ministru Estadu Prezidénsia Konsellu Ministrus (PKM), Agio Pereira, ohin, loron 1 fulan-abríl, tinan 2019, entrega ona, ba Prezidente Rejiaun Administrativa Espesiál Oekusi - Ambenu (RAEOA) nian, Marí Alkatiri, karreta foun rua ho modelu 4x4, ne’ebé kompletu ho nia ekipamentu ba servisu ambulánsia nian iha RAEOA, iha serimónia ida ne’ebé hala’o iha Palásiu Governu, iha Dili.

Parlamentu Nasionál, durante debate kona-ba Orsamentu Jerál Estadu nian ba tinan 2018, aprova ona proposta atu sosa ambulánsia rua atubele fó apoiu ba utente sira iha RAEOA, no PKM maka sai nu’udar responsavel ba sosa karreta sira-ne’e.

Ambulánsia rua ne’e sei hatán ba nesesidade hirak ne’ebé utente sira iha RAEOA sente, liuliu iha área remota sira, atu hetan asesu ba kuidadu saúde nian.

Aleinde fornese karreta rua ne’e, ne’ebé kompletu ho ekipamentu sira ba servisu ambulánsia nian, PKM sei fó mós formasaun adekuada kona-ba utilizasaun no manutensaun ekipamentu sira-ne’e nian.

Marí Alkatiri iha ninia intervensaun hateten ba jornalista sira katak “ambulánsia hirak-ne’ebé Ministru Estadu Prezidénsia Konsellu Ministrus entrega ne’e moderna no kompleta” no nia hatutan tan katak presiza atu fó “formasaun ba médiku no enfermeiru sira ne’ebé sei akompaña ambulánsia sira-ne’e” no “kria planu ida kona-ba manutensaun ba ekipamentu sira-ne’e”, atu aproveita potensialidade hotu-hotu husi ekipamentu hirak-ne’e”.

Prezidente RAEOA ne’e hateten tan katak “ambulánsia hirak-ne’e sei bele troka ambulánsia sira ne’ebé oras ne’e eziste iha Oekusi ne’ebé tuan ona no iha problema mekániku barak ” no “sei kobre sistema saúde tomak iha Oekusi”.

Diretór-Jerál Prezidénsia Konsellu Ministrus nian, Pedro Feno, deklara katak “akizisaun ambulánsia sira-ne’e tama iha kompromisu Governu sentrál nian atu apoia meiu asisténsia médika sira nian iha RAEOA”. Diretór-Jerál ne’e hateten tan katak “ambulánsia ho modelu Toyota Land Cruiser hirak-ne’e, ne’ebé fabrika iha tinan 2018, iha Dubai, Emiradus Árabes Unidus, ho folin totál hamutuk dolar amerikanu rihun 240,  rihun 158, hodi sosa karreta rua ne’e no dolar amerikanu rihun 82, hodi sosa ekipamentu médiku sira nian”. Pedro Feno hatutan katak hili  modelu karreta ida-ne’e nian “bazeia ba nesesidade atu asegura katak ambulánsia sira-ne’e bele ba to’o iha área remota sira iha foho”.