Governu Timor-Leste

Ministru Planeamentu no Investimentu Estratéjiku ein ezersísiu, Agio Pereira, simu konsesionária Bolloré no responsavel sira Timor Port SA nian, iha sorumutuk ba koordenasaun no informasaun nian ida kona-ba lala’ok serbisu projetu konstrusaun Portu Baía Tibar nian, iha loron 28 fulan-marsu, iha Palásiu Governu-Díli.

Portu Tibar, ne’ebé sei harii iha Tasi dilan Tibar, ne’ebé lokaliza kilómetru 10 husi parte loromonu Díli nian, iha munisípiu Likisá,, sai nu’udar infraestrutura prioritária ida ne’ebé identifika ona iha Planu Estratéjiku Dezenvolvimentu Timor-Leste ba tinan 2011-2030. Konstrusaun terminál ho nivel internasionál ida-ne’e hahú iha loron 30 fulan-agostu tinan 2018 liubá no ninia obra ezekuta liuhusi Timor Port SA, iha Parseria Públiku-Privada (PPP) entre konsórsiu Bolloré no Governu Timor-Leste, no prevee ona atu harii kais rua ho nia naruk maizumenus metru 630 ne’ebé tinan-tinan bele simu kontentór 870 000 ba leten.

Husi kedas tempu asinatura kontratu konsesaun nian iha fulan-juñu tinan 2016, konsesaun ida ba tinan 30, Timor Port SA hala’o ona estudu hotu-hotu kona-ba projetu ne’e, no mós análize kona-ba impaktu ba ambiente, no parte boot hosi servisu tékniku sira empreza nian estabelese ona iha Tibar, iha fatin ne’ebé Portu foun ne’e sei harii ba.

Portu Tibar sei sai hanesan Portu bee kle’an nian ho modelu foun liu no ho ekipamentu modernu sira ne’ebé sei permite movimentasaun ne’ebé lais no efisiente ba kontentór sira no karga. Portu Tibar sei iha mós kapasidade atu simu ró ho medida boot kompara ho Portu Díli nian, ne’ebé sei permite hamenus sasán nia folin no, ho nune’e, bele hatún folin ba konsumidór sira.

Durante faze konstrusaun nian, hein katak sei kria serbisu 1000 resin, ne’ebé barak liu maka sidadaun nasionál. Projetu ne’e, investimentu privadu boot liu ne’ebé to’o oras ne’e hala’o ona iha nasaun ba infraestrutura públika, hatudu sinál ida ba investidór sira seluk katak Timor-Leste sai nu’udar nasaun atrativu ida atu halo negósiu.

Aleinde Ministru Planeamentu no Investimentu Estratéjiku ein ezersísiu, partisipa mós iha sorumutuk ne’e mak Rafael Ribeiro, Diretór Timor Port SA, Eric Mancini, Reprezentante Bolloré ba rejiaun Ázia-Pasífiku, Philippe Jullie, Diretór Dezenvolvimentu Bolloré nian, no ekipa Unidade Jestaun Projetu Portu Baía Tibar (PMU-TBP-Project Management Unit-Tibar Bay Port).