Timor-Leste partisipa iha sorumutuk Forum ba Kooperasaun Ekonómika no Komersiál nian entre Xina no País sira Lian-Portugés nian
Sorumutuk Ordinária da-14 husi Sekretariadu Permanente Forum ba Kooperasaun Ekonómika no Komersiál nian entre Xina no País sira Lian-Portugés nian, hala’o iha loron 27 fulan-marsu tinan 2019, iha edifísiu World Trade Center , iha Makau.
Forum Makau harii iha fulan-outubru tinan 2003, liuhusi inisiativa Governu Sentrál Xina nian no ho koordenasaun ho nasaun hitu lian-portugés nian maka hanesan Angola, Brazíl, Kabu Verde, Giné-Bisau, Mosambike, Portugál no Timor-Leste, no ho kolaborasaun ho Governu Rejiaun Administrativa Espesiál Makau nian (RAEM). Forum ida ne’e simu ona mós, iha fulan-marsu tinan 2017, Saun Tomé no Prínsipe, ne’ebé sai hanesan país lian-portugés nian daualuk, ne’ebé partisipa iha forum ne’e. Forum Makau nu’udar mekanizmu multilaterál ida kona-ba kooperasaun intergovernamentál ne’ebé ninia objetivu mak atu konsolida interkámbiu ekonómiku no komersiál entre Xina no país sira lian-portugés nian, ne’ebé utiliza Makau hanesan plataforma ligasaun nian entre nasaun partisipante sira.
Embaixadór sira husi país sira lian-portugés nian no reprezentante sira husi delegasaun sira seluk halibur hamutuk iha eventu ne’e hodi halo balansu kona-ba serbisu ne’ebé Sekretariadu Permanente hala’o ona iha tinan 2018 no atu debate no aprova programa kona-ba atividade sira ba tinan 2019. Sekretariadu Permanente hili promosaun ba komérsiu no investimentu, aumentu ba kooperasaun iha kapasidade produtiva, formasaun ba rekursus umanus nian no interkámbiu kulturál entre Xina no país sira lian-portugés nian nu’udar prioridade sira ajenda serbisu nian ba tinan 2019.
Responsavel ba delegasaun nasionál nian, Embaixadór Timor-Leste ba Pekín, Bendito Santos Freitas, subliña ona katak liña asaun prinsipál ida husi Forum Makau nian maka kooperasaun iha área kapasidade produtiva, ho nune’e, nia deklara tan katak kooperasaun iha área ne’e sai hanesan potensiál ho forsa motriz ba dezenvolvimentu ekonómiku Timor-Leste nian.
Aleinde Embaixadór Timor-Leste ba Pekín, partisipa mós iha sorumutuk ne’e maka Iriana Ximenes, pontu-fokál no asesora seniór husi Gabinete Ministru Estadu Prezidénsia Konsellu Ministrus no Ministru Koordenadór Asuntus Ekonómikus ein ezersísiu, Danilo Afonso Henriques, Delegadu husi Timor-Leste ne’ebé haknaar an iha Sekretariadu Permanente Forum Makau nian no Mariano dos Santos, Adidu Imigrasaun iha Embaixada Timor-Leste ba Pekín.
