Governu Timor-Leste

Ministériu Reforma Lejizlativa no Asuntus Parlamentares Timor-Leste no Millennium Challenge Corporation (MCC) husi Estadus Unidus ofisiálmente lansa Ekipa Dezenvolvimentu Kompaktu ba Dezenvolvimentu Governu Timor-Leste nian (CDT-TL) iha segunda, loron 25 fulan marsu, atu lidera konsesaun no dezenvolvimentu ba programa ida hodi hatán ba dezafiu dezenvolvimentu Timor-Leste nian. MCC no Governu Timor-Leste hala’o tiha ona servisu iha dezenvolvimentu programa kompaktu tinan lima nian hodi hamenus kiak liuhusi kreximentu ekonómiku. Konsellu Administrasaun MCC selesiona Timor-Leste ba Kompaktu MCC nian iha fulan dezembru tinan 2017.

Prezidente Parlamentu Nasionál, Arão Nóe da Costa Amaral simu ona konvite ba prezide eventu ne’e no hato’o apoiu Parlamentu Nasionál nian ba inisiativa. “Objetivu husi parseria ne’e, atu promove kreximentu ekonómiku, tuir prioridade dezenvolvimentu nasaun nian. Hanesan baibain presiza lejizlasaun ne’ebé permite ba programa ne’e no ha’u hakarak ho laran atu fó apoiu ba prioridade hirak ne’e no ba ninia implementasaun”, tenik Prezidente Parlamentu Nasionál.

“Lori Parlamentu nia naran, no hato’o mós ba embaixadora Kathleen Fitzpatrick no ba povu Estadus Unidus nian, ba ita-nia belun sira, ita-nia rekoñesimentu ba sira-nia apoiu ba dezenvolvimentu Timor-Leste nian”, hatutan Prezidente.

Ministru Reforma Lejizlativa no Asuntus Parlamentares reafirma ninia kompromisu tomak Estadu nian ba parseria ho MCC. “Partisipasaun husi Prezidente Parlamentu Nasionál hatudu apoiu maka’as hosi instituisaun sira Estadu nian. Iha análize ikus nian, susesu hosi kompaktu ne’e, sei depende ba kompromisu hosi departamentu no ajénsia governmental sira nian”, hateten Ministru Reforma Lejizlativa no Asuntus Parlamentares.

“Ita-nia nasaun hein katak parseria ho MCC hosi Estadus Unidus bele reprezenta momentu desizivu ida iha ita-nia esforsu sira hodi hamenus kiak no dezenvolve ho kondisaun di’ak liu sira ba kreximentu ekonómiku no ba kriasaun empregu sira. Ne’e maka ha’u nia konviksaun firme katak ita sei alkansa susesu iha emprendimentu”, hatutan Ministru Fidelis Magalhães.

Marka prezensa iha eventu ne’e, mak hanesan, Ministra Edukasaun, Juventude no Desportu, Dulce de Jesus Soares, Ministru Obras Públika, Salvador Soares dos Reis Pires, Vise-Ministra Solidariedade Sosiál, Signi Chandrawati Verdial, membru Parlamentu Nasionál, altu funsionáriu sira hosi administrasaun públika, korpu diplomátiku, sosiedade sivíl no setór privadu.

Embaixadora Kathleen M. Fitzpatrick ko’alia liu kona-ba kooperasaun ne’ebé hala’o di’ak tebetebes, ne’ebé nasaun rua ne’e dezenvolve ona durante tinan barak nia laran. “Bainhira Timor-Leste no MCC embarka iha faze foun ba ita-nia relasaun bilaterál no dezenvolve ona paktu inovadór no transformadór ida, xave ba ita-nia susesu maka forsa parseria entre ita-nia ekipa rua ne’e”, dehan embaixadora Fitzpatrick. “Ha’u fiar-an katak parseria ne’ebé hala’o iha tempu naruk entre Estadus Unidus no Timor-Leste, bele fó rezultadu liuhosi investimentu ida ne’ebé bele aumenta oportunidade sira ba Timor-Leste tomak.”

Diretór Ezekutivu Nasionál ba Ekipa Dezenvolvimentu Kompaktu nian, Embaixadór Constâncio Pinto, hateten katak “programa MCC ne’e, sei reforsa kondisaun sira ba kreximentu ekonómiku no sei hakle’an liután relasaun entre povu no governu sira Timor-Leste no Estadus Unidus nian.”

Durante prosesu dezenvolvimentu kompaktu nian, CDT-TL sei dezenvolve programa espesífiku ida hodi hatán ba dezafiu ekonómiku sira nasaun nian, tuir buat ne’ebé maka Timor-Leste no MCC identifika hamutuk ona. Prosesu dezenvolvimentu kompaktu inklui komponente divulgasaun ida ba halibur sosiedade sivíl, setór privadu no parseiru dezenvolvimentu sira iha Timor-Leste.

Utiliza abordajen ida ne’ebé lidera husi nasaun sira ne’ebé haree ba prioridade sira nasaun ne’e nian, MCC fó osan no fó asisténsia ho tempu limitadu ba nasaun sira ne’ebé sei iha dezenvolvimentu ne’ebé kumpre padraun rigorozu sira governasaun di’ak nian, hahú husi kombate hasoru korrupsaun to’o ba respeitu direitu demokrátiku sira. MCC serbisu ho parseiru lokál sira no ko’alia kona-ba dezafiu balu ne’ebé urjente liu, husi nasaun sira ne’ebé maka sei iha hela dezenvolvimentu hasoru, hanesan asesu ba eletrisidade, bee moos, saúde, saneamentu no dezenvolvimentu rekursus umanus.

Ministru Fidelis Magalhães taka nia observasaun sira no hato’o ninia agradesimentu ba ekipa MCC. “ha’u hahii ami nia parseiru MCC sira, no, liuliu ba líder ekipa nasionál MCC nian ba Timor-Leste, Hana Scheetz Freymiller, ba nia profisionalizmu no dedikasaun durante ninia serbisu preparatóriu sira. Ha’u nia votus di’ak tebes ba Diretór Ezekutiva Nasionál, Embaixadór Constâncio Pinto, no ba ekipa tomak CD nian iha serbisu ezijente ne’e, hodi dezenvolve paktu efikás ida ba Timor-Leste. Agora maka tempu to’o ona. Mai ita hotu hahú serbisu”, Na’i ulun ne’e hatutan.