Governu Timor-Leste

Sekretáriu Estadu ba Formasaun Profisionál no Empregu (SEFOPE), Julião da Silva, no Sekretáriu Ezekutivu hosi Fundu Dezenvolvimentu ba Kapitál Umanu (FDCH) asina tiha Memorandu Entendimentu ida ho Prezidente Programa ba Estudu no Lian Koreana, Lee Jae Kwon, hodi hala’o asaun formasaun ba lian koreana. Serimónia asinatura memorandu hala’o ona iha loron-19 fulan fevereiru 2019 iha servisu-fatin SEFOPE nian.

Akordu koperasaun ida-ne’e eziste ona hahú kedas tinan 2012 maibé, iha tinan hirak ikus-ne’e la la’o, nune’e, ho asinatura kordu ne’e sei permiti, hahú kedas fulan marsu oin mai atu kapasita ema entre 2000 to’o 2500 benefisiáriu atu bele hetan oportunidade tuirmai hodi bá servisu iha Korea do Sul.

Julião da Silva hateten katak ‘’ impase polítiku iha tinan rua ikus ne’e prejudika traballadór timoroan barak tebes tan sira labele hetan oportunidade atu kontinua tuir formasaun lian koreana tan ne’e, oitavu governu, liuhosi memorandu entendimentu ida-ne’e hakarak atu reativa fali kursu ne’e hodi bele atende joven timoroan barak tebes ne’ebé inskreve ona iha kursu ne’e’’.

Sekretáriu Estadu dehan mós katak’’ Governu, iha tempu badak nia laran liuhosi SEFOPE sei kontinua haruka traballadór sira ne’ebé ramata ona kursu nomós iha ona kontratu atu bá servisu iha Korea do Sul’’.

Isménio Martins da Silva hateten katak ho asinatura memorandu ida-ne’e FDCH kumpri ona ninia devér hodi fó kontribuisaun ba polítika Estadu nian atu hamenus dezempregu no polítika oitavu Governu Konstitusionál nian atu promove ekonomia sosiál liuhosi hamenus dezempregu.